Andreas Maier (Dialäktdichter)
Dr Andreas Maier (* 6. April 1826 z Stockburg; † 17. Februar 1891 z Charlsrue) isch e dytsche Lehrer un Dialäktdichter gsii.
Läbe
[ändere | Quälltäxt bearbeite]Dr Maier isch anne 1826 z Stockburg bi Sanderge as Suhn vum Lochhofbuur Jakob Maier uf d Wält chuu. Är isch uf em Hof ufgwagse un z Stockburg uf d Dorfschuel gange, im Summer het er als mieße d Chie hiete. Do het er vyl gläse un zaichnet. En evangelische Bfaarer vu Munkwiiler hat sy Talänt entdeckt un ihn Sproche un Mathematik glehrt. No dr Kumfermazion het dr Maier fir ai Johr (1841) uf di Hecher Burgerschuel z Villinge chenne un derno an s Polytechnikum z Charlsrue. Är het welle Ingenieur gee, aber wel em s Gäld uusgangen isch fir e Ingenieurstudium, het er e Lehrstell fir Mathematik am Institut Kayser z Haidelberch aagnuu un derzue Vorläsige an dr Uniwersitet bsuecht. Är isch nocherdani in braktische Geometerdienscht drätte. Im Spotjohr 1847 het er d Briefig fir Mathematik, Physik, Chemy un Naturgschicht gmacht un druf e Stell as Hauptlehrer an dr Gwärbschuel z Triberg iberchuu. Anne 1848 isch er Lehrer z Ättene un z Brusel gsii un vu 1849 bis 159 an dr Hechere Burgerschuel z Sinse. Vu 1859 bis 1863 het er as Laiter an dr Gwärbschuel z Villinge unterrichtet un isch derno Brofässer an dr Hechere Burgerschuel z Charlsrue wore, wun er bis zue sym Dod unterrichtet het. Näbe syre Arbet as Lehrer het er Gedicht uf Alemannisch gschriibe, ne Uuswahl het er anne 1876 unter em Titel „Klänge von der Sommerau“ uusegee.
Schrifte
[ändere | Quälltäxt bearbeite]- Klänge von der Sommerau. Volksgesänge in allemannischer Mundart. 1876.
Literatur
[ändere | Quälltäxt bearbeite]- Franz Brümmer: Lexikon der deutschen Dichter und Prosaisten vom Beginn des 19. Jahrhunderts bis zur Gegenwart. Bd. 4. 6. Aufl. Leipzig, 1913. S. 351 (Digitalisat)
Weblink
[ändere | Quälltäxt bearbeite]- Maier, Andreas uf LEO-BW