Ordinatio imperii

E aglüegti Version vo derre Site, wo am 8. März 2021 freige worre isch, basiert uff derre Version.

Mit dr Ordinatio Imperii het dr Ludwig dr Fromm brobiert, em fränkische Riich e neui Ornig z ge. D Reglig, wo us 18 Kapitel bestanden isch, isch im Johr 817 im Reformriichsdag z Aache mit dr Zuestimmig vom Adel und dr Chille erlo worde. Dr Ludwig het siis Erb welle in Ornig bringe, nochdäm er drei Möned vorhär am Grüendonnstig in däm Johr bim ene Unglück, wo vili anderi dödet het, fast umcho wer.

Noch de klassische Beschriibige het dr Ludwig d Uffassig, wo denn in dr Chille gherrscht het, agnoh, wo as Ideal e vereints Christetum under eme einzige Herrscher gha het, und het sich drbii uf en Adel gstützt, wo mit de Karolinger gross worden isch und wo Angst gha het, ass er bi nere Riichsdeilig Bsitz wurd verliere.

Bestimmige

Mit dr Ordinatio Imperii het me welle d Erbregelig verändere, wo gsait het, ass s Riich under de Nochkomme zu gliiche Deil sött ufdeilt wärde. S neue Ziil isch s gsi, dass s fränkische Riich en Eiheit wurd bliibe. Noch dr Ordinatio het dr eltist Sohn vom Ludwig em Fromme, dr Lothar I., Kaiser vom Riich sötte wärde, siini Brüeder, dr Pippin und dr Ludwig dr Dütsch hätte sötte König z Aquitanie, dr Pippin, und z Bayre, dr Ludwig, wärde, im Pippin si Sohn hätt sötte König vo Italie bliibe, aber alli hätte sötte em Kaiser understellt si, wo diräkt über dr Räscht vom Riich hätt sötte herrsche. Im Fall vom Dod vom ene Underkönig wer är vo siine Söhn beerbt worde, wenn er aber ohni Chinder gstorbe wer, hät dr Lothar siis Königriich sötte erbe. Wenn dr Lothar ohni Söhn gstorbe wär, hätt "vom Volk" en andere Sohn vom Ludwig em Fromme zum Nochfolger sötte gwehlt wärde.

Nochspiil

Wäge dr zweite Frau vom Ludwig, dr Judith, won er e Sohn, dr Karl dr Kahli mit ere gha het, isch d Ordinatio Imperii nit lang gültig bliibe, wil dr Ludwig, und wohrschiinlig isch d Judith drhinder gsi, d Ordinatio Imperii gänderet het, ass au dr Karl öbbis wurd erbe. Das hai dr Lothar und siini Brüeder nit well akzeptiere und het zum ene Bruederchrieg gfüehrt, wo im Verdrag vo Verdun gändet het.

Literatur

Fleckenstein J., "Ordinatio Imperii" im Lexikon des Mittelalters, Band VI, Münche 1993 S. 1434ff.