S Zwäite Konzil vo Lyon

S Zwäite Konzil vo Lyon, wo 1274 z Lyon under dr Läitig vom Babst Gregors X. stattgfunde het, het über drei wichdigi Frooge entschiide: D Union mit de Grieche, e Chrüzzuug und d Reformierig vo dr Chille.

Gschicht

Dr Gregor X.

Am 31. März 1272 het dr Gregor d Versammlig iiberüeft und het im Merz 1273 alli Christe um ihre Mäinig und iiri Hilfe bi dr Reformierig vo dr Chille bittet. D Versammlig isch zwäi Joor lang vorberäitet worde und isch schliesslig am 7. Mai 1274 eröffnet worde. Öbb 300 Bischöf, 60 Äbt und e Hufe anderi Chirchelüt und Theologe si drbii gsi, aber nid dr Thomas vo Aquin wo uf dr Räis uf Lzon gstorbe isch. Au dr Jakob I., dr Köönig vo Aragon, und Delegierti us Frankriich, Dütschland, Ängland und Sizilie höi mitgmacht und e Delegazioon vo de Tatare. D Grieche si erst am 24. Juni aachoo, wil si Schiffbruch erlitte häi. Denn si braktisch Verdräter vo dr ganze Christehäit aawääsend gsi und d Versammlung het chönne as universal und ökumenisch gälte, wie es dr Gregor het welle.

Es het säggs Sitzige gee, uf dr vierte isch am 6. Juli festgläit worde, ass mä die westligi und die östligi Chille wider wurd veräine. Das het aber nid lang ghebt. Es gseet us, wie wenn d Union de Grieche vom byzantinische Kaiser Michael VIII. ufzwunge worde isch, wil dä d Understützig vom Babst het welle gegen e Karl vo Anjou, won e Aagriff uf s byzantinische Riich blaant het. Die mäiste griechische Kleriker si aber gege d Union gsi. Mä wäiss au nid genau, wie seer d Union vo de Noochfolger vom Gregor understützt worde isch. S Konzil het au no beschlosse, e nöije Chrüzzugg z mache. Es het aber am Wille und am Gäld gfeelt, au wemm mä wider e Chrüzzuugsstüür für säggs Joor bewilliget het.

Weblingg

• Second Council of Lyons - 1274

Dä Artikel basiert uff ere fräie Übersetzig vum Artikel „Zweites_Konzil_von_Lyon“ vu de dütsche Wikipedia. E Liste vu de Autore un Versione isch do z finde.