Zürcher Unterland

Us der alemannische Wikipedia, der freie Dialäkt-Enzyklopedy
Hops zue: Navigation, Suech

S Züri-Underland isch de nordweschtlichi Täil vom Kanton Züri und bestaat us de Bezirk Tielschtoorff und Büüli. Es gränzt im Weschte as Aargi und gaat im Noorde über de Rhy, wo s Schtädtli Eglisau und s Rafzerfäld liged. Ussert Eglisau sind na Rägischbëërg mit em Schloss und Büüli guet erhalteni alti Schtädtli.

Bi Neeri lyt s Neeracherriet, es Flachmoor, wo s SVS Naturschutzzentrum staat und wo vili sältni Tier beobachtet wëërde chönd. Au im Rafzerfäld wëërd versuecht, d Artevillfalt vo Tier und Pflanze wider hööcher z mache.

Im Züri-Underland lyt au de Fluughaafe Chloote. Wäge dëm und de Nëëchi vo de Schtadt Züri verschtädteret naadinaa de Süüdtäil vom Züri-Underland. De nöördlich Täil isch ländlich und drum e beliebti Naaerholigszoone vo de Schtädter.

Z Rägischtoorf isch s Gfängnis Pöschwiis, wo Mane igschpeert wëërded, wänn si schwëëreri Verbräche begange händ.

Weblink[ändere | Quälltäxt bearbeite]

 Allmänd (Commons): Züri Underland – Sammlig vo witere Multimediadateie