Yves Tanguy

Us der alemannische Wikipedia, der freie Dialäkt-Enzyklopedy

Dr Yves Tanguy (* 5. Januar 1900 z Bariis, as Raymond Georges Yves Tanguy; † 15. Januar 1955 z Woodbury, USA) isch e franzöösische Mooler vom Surrealismus gsi.

Im Yves Tanguy sini Landschafte si mänggisch luftig liicht, Wulkeformazioone äänlig, mänggisch erinnere si an dr Grund vo Meer oder an d Oberflechene vo fremde Blaneete. Nie si si äindütig: Es si surreali Landschafte im woore Sinn vom Wort. Sini verschlüsslete Bildwälte si au hüte rätselhaft.

Lääbe und Wärk[ändere | Quälltäxt bearbeite]

Däilbaarkäit ooni Änd
Yves Tanguy, 1942
Surrealismus
Albright Knox Art Gallery, New York

Link zum Bild
(Bitte Urheberrächt beachte)

Dr Tanguy isch 1900 z Bariis uf d Wält choo. Er isch en anarchische und gliichzitig schwigsaame Mensch gsi. Während siner Zit am Gymnasium het er dr Pierre Matisse droffe, wo s Fründ und spööter si Sammler worde isch. 1923 het er en Usstellig vom Giorgio de Chirico in dr Galerii Paul Guillaume gsee und het beschlosse, Mooler z wärde. Dr Tanguy isch Autodidakt gsi, er het 1923/24 aagfange afo zäichne und aquarelliere. Er isch denn vom Dadaismus beiiflusst und no wit vo dr Pittura metafisica äwägg gsi. In de früeje Wärk vom Tanguy gspüürt mä d Iiflüss vom Expressionismus, vom Kubismus und vo dr neue Sachlichkeit. No 1925 het er sich em Surrealismus zuegwändet. In dam Joor het er d Jeannette Ducrocq ghürootet. Dr Tanguy het Kontakt zum André Breton, Louis Aragon, André Masson, René Magritte, Salvador Dalí und Max Ernst ghaa, isch aber in deeren iirem Schatte bliibe. D Bildsprooch, won er in dr Middi vo de 1920er Joor entwickelet het, het er witgeend biibehalte. Er het au erotischi Zäichnige gmacht, wi um 1928 acht Illustrazioone zu Les Couilles Enragées für e Verlreger René Bonnel, Bariis. Bin ere Razzia vo dr Bolizei si die bim Drucker Gaston Coquette beschlagnaamt worde, und dr Verleeger het si Brojekt ufgee. In dr Middi vo de 50er Joor si si zum erste Mol veröffentligt worde und zwar im Wärk Maria Comburg, Journal intime d'une provinciale, wo dr Verleeger as Philéas Fogg, London-Melbourne-Calcutta, aagee isch. Daatsächlig het sich drhinder dr Bariiser Verleeger Eric Losfeld versteckt. Im Joor 1938 isch dr Tanguy maassgääblig an dr Exposition Internationale du Surréalisme in dr Galerii Beaux-Arts z Bariis bedäiligt gsi.

Dr Tanguy isch im Novämber 1939, noch em Usbruch vom Zwäite Wältchrieg, in d USA emigriert. Sini Bilder si zum Däil Kommentar gsi zu Ufrüstig und Chrieg. 1940 het er die amerikanischi surrealistischi Künstlere Kay Sage ghürootet. 1942 het er an ere Usstellig in dr Peggy Guggenheim iirer Galerii Art of This Century z Manhattan mitgmacht.

Dr Tanguy isch 1955 z Woodbury, Connecticut, am ene Hirnschlag gstorbe, nochdäm er scho Joore lang nit guet zwääg gsi isch. E baar vo sine Wärk si postum uf dr documenta II (1959) z Kassel zäigt worde.

Wärk[ändere | Quälltäxt bearbeite]

  • 1927: Schattenland, Detroit Institute of Art, Detroit
  • 1927: Er machte, was er wollte, Sammlig Richard S. Zeisler, New York
  • 1928: Der dunkle Garten, Kunstsammlig Nordrhii-Westfale, Düsseldorf
  • 1937: Die Sonne in ihrem Schmuckkästchen, Solomon R. Guggenheim Museum, New York

Litratuur[ändere | Quälltäxt bearbeite]

  • Thomas Krens (Vorwort): Rendezvous. Masterpieces from the Centre Georges Pompidou and the Guggenheim Museums. Guggenheim Museum Publications, New York 1998, ISBN 0-892-07213-x

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Yves_Tanguy“ vu de dütsche Wikipedia. E Liste vu de Autore un Versione isch do z finde.