Wikipedia:Tour/3

Us der alemannische Wikipedia, der freie Dialäkt-Enzyklopedy
Wikipedia-Tour
zruck | 1 | 2 | 3 | 4 | 5 | witer

Über Süech, Index oder Kategory bisch jetz bi me Artikel glandet - was machsch demit? An derre Stell e bitz öbbis zum Konzäpt vo de Wikipedia.

D Wikipedia isch e Enzyklopädy, wo nit vo-n-re bezahlte Redaktion, sondern vo Freiwillige i me offene Redaktionsprozäss gschriibe wird. Alli Artikel chönne ohni Amäldig vo jedem gändert werre - zum Güete wie au zum Schlächte. Theoretisch wie praktisch isch's jederzit möglig, in e Wikipedia-Artikel Unsinn yne z schrybe. Trotzdem bstö mr in de Mehrzahl nit uss Unsinn, sondern uss bruchbare Artikel, wo kommerziälli Pendants s Wasser länge chönne. Problematisch blibt: Mer cha ebbe nie ganz sicher sy, ob de Artikel, wo mer vor sich hät, vo me Profässer verfasst worre isch oder ob e glangwylter Schieler im Informatikunderricht grad alli Zahle durrenand gwürfelt hät.

Vyli Lüt ziehn do druss de Schluss, dass d Wikipedia als Nochschlagwerch undauglig isch. Sälli schicke mr an derre Stell mit de herzligste Empfehlige e Hus witer. Für de Räst versüeche mr jetz z erchläre, wie dr d Qualität vo me Artikel in de Wikipedia yschätze chasch.

Artikel beurdeile

  • Überprief d Fakte, bevor dr si i me wichtige Zämmehang verwändsch. S schadet nie, mehreri Quelle azlüege.
  • Lys de Artikel mit wachem Verstand - isch de Inhalt in sich logisch und stimmig? Isch s i me aständige Alemannisch und me güete Styl verfasst?
  • Lüeg dr d Diskussionssite vom Artikel dure (Link Diskussion in de Leiste oberhalb vom Sitetitel). Wird de Inhalt kritisiert? Wird um en gstritte?
  • Wirf au e Blick in d Versionsgschicht (Link Versione/Autore oberhalb vom Sitetitel). Bi de agmäldete Benutzer chunnsch über e Klick uff de Spitznamme uff ihri Benutzersite. Dört chasch meh über d Autore usefinde. Uff ihrer Diskussionssite (Link Diskussion obe) findsch au use, ob über e Artikel vo sällem Autor gstritte wird/worre isch.


Witer in de Tour