Wikipedia: Kei persenligi Aagriff

Us der alemannische Wikipedia, der freie Dialäkt-Enzyklopedy


In dr Alemannische Wikipedia isch kei Platz fir persenligi Aagriff.

S chunnt vor, ass sich Benutzer iber dr Inhalt vun eme Artikel nit einig sin. S cha au syy, ass si im „richtige Läbe“ grundlegendi Differänze hän, villicht ghere si „gegnerische“ Lager aa.
In dr Wikipedia sin aber alli Teil vun eire Gmeinschaft– mir sin alli Wikipedianer.
Persenligi Aagriff schade dr Gmeinschaft un schrecke anderi Benutzer ab. Niemer cha s lyde, wänn er bschimpft wird.

Vergässe nit, ass Konflikt, wu uf Diskussionssyte un in dr Artikel uustrait wäre, allgmein zuegängig sin fir di andere Wikipedianer, aber au fir di breit Effentligkeit. Wie Ihr ich in dr Wikipedia verhalte, cha vu jedem Internetnutzer noovollzoge wäre.

Vor allem Neji sott mer in ere Diskussion bsundersch vorsichtig behandle.

  1. Versueche alliwyl, dr Standpunkt vu andere Benutzer z reschpektiere. Des heißt nit, ass Ihr dermit mien iberyystimme.
  2. Ihr sotten ich nume wäg ere Uusag uueinig syy, nie aber wäg em persenlige Hintergrund vum andere. E Aasicht isch nit uuberächtigt, nume wel si vun eme Benutzer chunnt, wu politisch andersch dänkt oder wu e bstimmti Nationälität het, oder wel si oder vun eme Mann oder vun ere Frau chunnt. E Aasicht isch au nit uuberächtigt, nume wel si vun eme Benutzer chunnt, wu kei Alemannisch cha.
  3. Wänn e Probläm persenlig wird, versueche s iber E-Mail z kläre. Oder wänden ich an e andere Benutzer, wu villicht cha vermittle zwische Ejch.
  4. Villicht finde Ihr d Position vu Ejrem Gegeiber exzäntrisch oder gar inakzeptabel. Des cha durchuus syy, aber vergässe nit, ass d Wikipedia sich am neutrale Standpunkt orientiert. Ihr schrybe nit an „dr eine Wohret“. Nit konventionälle Aasichte vu Benutzer sotte reschpektiert wäre, au wänn Ihr nit mit ene yyverstande sin. D guldi Regle heißt: Sin tolerant.

E paar vu sonige Aagriff gege anderi Benutzer sin:

  • Beleidigunge
  • Ible Nochrede un Verleumdige dur falschi oder nit nochwysbari Tatsachebehauptige, uubegrindeti Nazivorwirf
  • Abwärtendi Uussage im Zämmehang mit dr muetmaßlige oder tatsächlige Zuegherigkeit vun eme Benutzer zuen ere Gruppe (z. B. zuen ere Ethnii, eme Gschlächt, ere sexuälle Orientierig, ere Altersgruppe oder eme Bildigsstand, ere soziale Klasse, ere Religion oder andere). In dr Wikipedia derf jede Mänsch mitmache uuabhängig vu synre Härchumft un synre Läbenswys, solang er sich an d Grundsätz vu däm Projekt haltet.
  • Drohige gege Lyyb un Läbe
  • Drohige mit rächtlige Schritt go ne Meinig bi dr Gstaltig vu Artikel- oder Projektsyte durezsetze. Sachligi Hiiwys ohni Drohcharakter uf muetmaßligi Rächtsverletzige (z. B. Versteß gege s Urheberrecht, Volksverhetzig, Verleumdig, Beleidigung) sin aber kei persenligi Aagriff.

S git kei Rächtfertigung fir sonigi Aagriff uf anderi Benutzer.

Hiiwys: Au fir verglychbari Aagriff uf Persone, wu in Artikel bschribe wäre, bietet d Wikipedia kei Platz.

  • Persenligi Aagriff chenne vu jedem Benutzer glescht wäre. Doderby isch s sinnvoll, uf die Syte (WP:KPA) z verwyse, des isch aber nit notwändig. S isch schwirig z entscheide, eb e Aagriff lieber vum aagriffene Benutzer sälber soll glescht wäre oder vun eme andere. Wänn dr Benutzer, wu aagriffe wore isch, dr Aagrif sälber usenimmt, cha dr Stryt eskaliere. Wänn s eber ander macht, cha dr aagriffe Benutzer nimi andersch reagiere, z. B. dr Aagriff ignoriere oder dr Konflikt mit eme Scherz entschärfe.
  • Persenligi Aagriff chenne ohni Vorwarnig mit ere sofortige bfrischtete Sperri bstroft wäre, in schwäre Fäll au mit ere uubfrischtete. D Form un d Duur vu dr Strof wäre vun eme Ammann (Administrator) feschtgleit. In problematische Fäll cha ne Sperrverfahre yygleitet wäre.
  • S spilt kei Roll, wär persenligi Aagriff formuliert. Au gueti Artikelarbet, Ammanneamt un anderi Faktore hän uf d Wahl vu dr Sanktion un vu dr Duur kei Yyfluss – e Beleidigung wird nit besser, wänn si vun eme „verdiente Wikipedianer“ stammt.
  • Jeder cha persenligi Aagriff eme Ammann (Administrator) mälde.
  • E feschtgleite Katalog vu Maßnahme git s nit, wel s vili verschideni Megligkeite vu persenliger Aagriff git un Umständ, wu sonigi Aagriff chenne gschribe wäre. Di glych Wortwahl cha je noch Umstand scherzhaft bis besartig gmeint syy un ufgfasst wäre.
  • Entschuldigunge oder Erklärige chenne zuen ere Verminderig oder Ufhebig vu dr Sanktion fiere, wänn si erkännbar ärnscht gmeint sin un zuen ere Deeskalation byytrage.