Wikimedia
De Begriff Wikimedia bezieht sich vor allem uff d Wikimedia Foundation (alemannisch Wikimedia-Stiftig, churz: WMF), wo e internationali, nitstaatligi gmeinnützigi Organisation isch, wo freis Wüsse fördere wott. Für d Sammlig, Entwicklig und Verbreitig vom Inhalt werre Wikis ygsetzt. Mit Abstand s bekanntste Wiki isch di freii Enzyklopädy Wikipedia, denäbe git's aber no vyl meh Brojäkt.
Usserdëm git's nationali Wikimedia-Organisatione (chapters), wo rächtlig gseh meistens ydrageni Verein ßin. Si understütze d Wikimedia-Brojäkt, bedrybe si aber nit und hän au kei Yfluss uff d Inhalt. Im dütschsprochige Ruum ßin d Wikimedia Dütschland, d Wikimedia Österrych und d Wikimedia CH aktiv.
Inhaltsverzeichnis |
[ändere] Organisation
[ändere] Übersicht
[ändere] Organisation
D Wikimedia Foundation Inc. isch e Stiftig noch em Rächt vom US-amerikanische Bundesstaat Florida. Si hät also keini Mitglyder, sondern numme e Satzig und e Kuratorium; im Underschyd züe-n-re europäische Stiftig hät si kei Kapital, wo d Organisation vo de Zinse devo zehre dät.
D Gründig hät de Jimbo Wales, de Wikipedia-Gründer, am 20. Juni 2003 bekanntge. Wo d Wikimedia Foundation gründet worre isch, hän re de Jimbo Wales und de Bomis alli Rächt (an Näme, Domäne und Server) überdrage, wo im Zämmehang mit de Wikipedia oder ihre Schwösterbrojäkt stönn.
De Name Wikimedia hät de Sheldon Rampton erfunde, wo e amerikanische Autor und Bedryber vo de SourceWatch (vorher Disinfopedia) isch.
[ändere] D Gschäftsstell
D Wikimedia Foundation hät zersche e Büro z Saint Petersburg (Florida) gha, sit Änd 2007 isch säll z San Francisco. Dört schaffe öbbe 15 Mitarbeiter; di meiste vo-n-ne känne sich mit de Technik us.
[ändere] Vorsitzendi vom Kuratorium
S höchst Gremium vo de Stiftig ischs Kuratorium (Board of Trustees). De Vorsitzend isch sit em Juli 2008 de Michael Snow. Usserdëm git's Gremie wie e Byroot und Arbetsgruppe.
- Juni 2003 bis Oktober 2006: Jimbo Wales
- Oktober 2006 bis Juli 2008: Florence Nibart-Devouard
- sit em Juli 2008: Michael Snow
[ändere] Nationali Organisatione
Am 13. Juni 2004 isch z Berlin mit em Verein Wikimedia Deutschland - Gesellschaft zur Förderung freien Wissens e. V. (uff Alemannisch "Wikimedia Dütschland - e Gsellschaft für d Förderig vo freiem Wüsse i. V.) di erschti nationali Wikimedia-Organisation gründet worre. Im Oktober vom glyche Johr isch di französischi Wikimédia France gfolgt. Mittlerwyli git's in vyle andere Länder lokali Wikimedia-Organisatione, under anderem z Idalie, Großbritannie, Taiwan, Israel, de Schwiz, z Holland und z Östrych.
D Organisatione werre uff Änglisch Chapter gnännt. Si ßin aber eigeständig und nit vo de Wikimedia Foundation abhängig, si griege aber vo de Foundation s Rächt, im jewylige Land mit de patentierte Bezeichnig Wikimedia uffzdrätte und di sunschtige Marke vo de Stiftig z verwände.
Di nationale Organisatione understütze vor Ort d Wikimedia-Brojäkt, zum Bispyl durch d Verastaltig vo Dräffe und Workshops oder durch Öffentligkeitsarbet. Si bedrybe keini Brojäkt wie d Wikipedia oder d Wikiquote, wyl säll d Uffgab vo de Wikimedia Foundation isch. Usserdëm dien di nationale Organisatione keini Inhalt an de Wikipedia oder andere Brojäkt ändere. Ordnigsdienscht in de Brojääkt leiste d Administratore und alli andere Bearbeiter.
Di jewylige Internetadrässe wikipedia.de, wikipedia.at und [1] wyse us rächtlige Gründ als Domäne-Eigner di nationale Verein us, nit d Wikimedia Foundation, wo d Internetsite wikipedia.org bedreut. Uff sälle drei Site findet mer e Portal für d Wikipedia, wo uff d Länder abgstimmt ßin.
[ändere] Brojäkt
In allne Wikimedia-Brojäkt erstelle d Nutzer gmeinschaftlig d Inhalt, es hät also keini Redaktione, wo entscheide chönne oder bezahlt werre. D Inhalt ßin normalerwis frei; fast alli Tekscht stönn under de GNU-Lizänz für freii Dokumentation. Als technischi Blattform vo de Brojäkt nimmt mer s Programm MediaWiki, wo vor allem zu dëm Zwäck erstellt worre isch.
Zu de wichtigste Brojäkt zälle näbe de freie Enzyklopädy Wikipedia s Wikiwörterbüech (Wiktionary) und d Wikibiecher (Wikibooks, e Brojäkt, wo freii Lehrmaterialie sammelt) und d Wikiquote, wo Zitat sammelt. Witeri ßin d Wikisource für freii Tekscht, s experimentäll Arteverzeichnis Wikispecies, d Bild- und Audiodateiesammlig Wikimedia Commons, di freii Nochrichtequälle Wikinews und d Wikiversity, e Blattform für di gmeinschaftligi Bearbeitig vo wüsseschaftlige Brojäkt.
Lut ComScore ßin d Wikimedia-Brojäkt im Juni 2008 vo insgsamt 250 Millione Bsüecher wältwit uffgrüefe worre.
[ändere] Technischi Infrastruktur
Für de Bedryb vo de verschydene Brojäkt underhaltet d Wikimedia Foundation e umfangrychi technischi Infrastruktur. De Chern vo säller isch e Rächezändrum z Tampa, Florida, wo's im 285 Dienschträchner (Server; Stand Dezämber 2007) hät. Denäbe git's no chleineri Standört z Aubervilliers, Seoul und Amschterdam mit 5, 23 bzw. 43 Server. Im Gsamte ßin dodemit 356 Server in Bedryb.
[ändere] Finanzierig
D Wikimedia finanziert sich bisher fast numme durch Spände. Säll ßin vor allem chleineri Einzelspände vo Brivatpersone gßi. Usserdëm griegt si Gäld- und Sachzüewändige vo andere Stiftige und Undernämme, zum Bispyl sit em Friehjohr 2005 de Süechmaschine- und Internetportal-Bedryber Yahoo!.
[ändere] Netzgleicher
- wikimediafoundation.org – Netzsite vo de Wikimedia Foundation
- wikimedia.org – Ystygssite vo de Wikimedia Foundation – au uff d Wikimedia-Brojäkt
- meta.wikimedia.org – S Meta-Wiki isch e Dokumentations- und Diskussionsblattform für alli Wikimedia-Brojäkt
- wikimedia.de – Netzsite vom Verein Wikimedia Dütschland – Gsellschaft für d Förderig vo freiem Wüsse
- wikimedia.ch – Netzsite vom Verein Wikimedia CH – Verein für d Förderig vo freiem Wüsse
- wikimedia.at – Netzsite vom Verein Wikimedia Östrych – Gsellschaft für d Förderig vo freiem Wüsse
Allmänd (Commons): Wikimedia Foundation — Witeri Mulitimediadateie zum Artikel
Dr Artikel basiert uf 'ra freie Ibersetzung vum Artikel „Wikimedia“ us dr dytsche Wikipedia.
E Lischte mit de dörtige Autore kasch dörte aluege
