Walter Fröhlich

Dialäkt: Bodeseealemannisch (Linzgau)

De Walter Fröhlich (* 9. Januar 1927 z Radolfzell) isch en deitsche Journalist und Schriftsteller, wo vor allem als Kolumnist und Mundartautor im bodeseealemannische Dialekt vu Konstanz und em Hegau bekannt woren isch.

Biografii

De Walter Fröhlich isch z Konstanz ufgwagse und lebt heit z Singe. Er hot noch de Schuel e Banklehr gmacht, isch no aber zum Kriegsdinscht iizoge wore und i Gfangeschaft kumme. Noch em Zwoite Weltkrieg hot er zerscht e Redaktionsvolontariat und no e Stell als Redakteer i de Deutsche Bodensee-Zeitung gkrieht. Vu 1952 bis zu sinere Rente hot er bi de Firma Alusingen i de Werbung, als Fotograf und Redakteer vu de Werkszeitung gschaffet.

Pseidonym

S Pseidonym Urban Klingele hot de Walter Fröhlich fir sine Kolumne im Singemer Wocheblatt gwählt. De Name wafrö, won-er gern bruucht, isch sin aalts Redaktionskirzel vu de Zeitung.

Schriftstellerische Arbet

De Fröhlich isch lang i de Fasnet am Ort unter anderem als Dichter und Bütteredner aktiv gsi. 1957 bis 1962 hot er zum jewiilige Fasnetmotto vu de Poppelezumft Singe alemannische Lieder dichtet und vertoont, wo heit no i de Singemer Fasnet populär sind. Gege End vu de 50er Johr hot er aagfange, all Woch e Dialektkolumne im Schwarzwälder Bote schriibe, bis der si 15 Johr später us Singe zruckzoge hot. Vu 1985 bis 2010 hot er no die Wochekolumne im Singemer Wocheblatt wider ufgnumme. Mit alefänzige Anmerkunge zu me Buech mit Holzschnitt zu de Fasnet und oegeständige Vereffentlichunge vu sinere Kolumne im Wocheblatt hot er aagfange au Biecher schriibe. Seither hot er e ganze Roihe Biecher mit Gedicht oder ironische Kurztext zu Alltagstheme uf alemannisch vereffentlicht. Denebe hot er mehfach Artikel zu Mundart und Persenlichkeite vum Bodeseeraum unter anderem im Singemer Johrbuech und im Konstanzer Almanach publiziert. Bis heit isch er dezue naa mit Lesunge und Vorträg zum Thema Mundart au iber de Bodeseeraum naus unterwäegs.

D Haupttheme vum Wafrö sind us em Alltag ggriffe. Er setzt sich gern humorvoll und ironisch mit Schwäche vu sich und sine Mitmensche, oder mit Fehlentwicklunge i de moderne Gsellschaft usenand. E große Rolle spilt au de Dialekt, wo sine Text dri verfasst sind. E großes Aalige isch em s, zum de Dialekt ferdere und erhalte. Des hot sich au i Wertersammlunge (z. B. Alemannisch für Anfänger) nidergschlage.

Uuszeichnunge

• 1977 erste Träger vum Alefanz-Orde vum Fasnetmuseum Schloss Langestein
• 1991 Hegaupreis
• 1993 große Kulturpreis vu de Stadt Singe
• 1995 Johann-Peter-Hebel-Medaille vu de Muettersproch-Gsellschaft (Gruppe Hegau)
• 1997 Bundesverdinstkreiz vu de Bundesrepublik Deitschland

Werk

Vereffentlichunge

• (mit em Lothar Rohrer): Unsere Fasnacht. Mit Holzschnitt vum Lothar Rohrer. Verlag des Südkurier, Konstanz 1978. ISBN 3-87799-009-6.
• Urban Klingele (Pseudonym): Alemannisch für Anfänger. Frese, Singe 1978. 35 S. Nochdruck 1988.
• Urban Klingeles saudumme Gosch. Singener Wochenblatt, Singe 1982.
• Wa mi druckt und wa mi freit. Meine Gedichtle. Stadler, Konstanz 1984. ISBN 3-7977-0127-6.
• Jessesna - isch des ä Lebe. Ein neues Mundartbuch. Stadler, Konstanz 1988. ISBN 3-7977-0197-7.
• Wa i denk - wenn i denk. Be- und sinnliche Gedichtle. Stadler, Konstanz 1986. ISBN 3-7977-0150-0.
• Mer sott it so vill denke. Stadler, Konstanz 1990. ISBN 3-7977-0245-0.
• S Bescht und s Schänscht vum Wafrö. Stadler, Konstanz 1992. ISBN 3-7977-0269-8. Neiuflag 1995. ISBN 3-7977-0314-7.
• Filusofisch gsäeh vum Wafrö. Stadler, Konstanz 1994. ISBN 3-7977-0302-3.
• "Mer sott's it fir meglich halte!" : Neujahrsgedanken eines badischen Seehasen im Exil. Neijohrsempfang vu de Stadt Fridrichshafe (Forum FN 38). Stadt Friedrichshafen, Fridrichshafe 1994. ISBN 3-926162-76-7.
• S wird all bleder mont de Wafrö. Stadler, Konstanz, 1996. ISBN 3-7977-0357-0.
• Wie mer's macht isch's nint. Denkt de Wafrö. Stadler, Konstanz 1998. ISBN 3-7977-0415-1, Neiuflag 2002.
• So isch worre. bim Wafrö Stadler, Konstanz, 2001. ISBN 3-7977-0465-8.
• Versle - nix als Versle vum Wafrö. Stadler, Konstanz 2002. ISBN 3-7977-0476-3.

Tonträger

• Audio-CD Filusofisch gsäeh vum Wafrö. In Kooperation mit em Sidweschtfunk Friiburg. Stadler, Konstanz [1994].

Weblinks

• Literatur vu un iber Walter Fröhlich im Katalog vu dr Dytsche Nationalbibliothek
• Biografii vum Walter Fröhlich uf de Homepage vu de Muettersproch-Gsellschaft