Viktor Emanuel II.

Viktor Emanuel II.

Dr Viktor Emanuel II. (italiänisch Vittorio Emanuele) (* 14. Merz 1820 z Turin; † 9. Januar 1878 z Rom) isch vo 1849 bis 1861 König vo Sardinie gsi. Er het zum Huus Savoye ghört, wo für d Einigung vo Italie iidrätte isch. Das isch vo de Freiwilligeverbänd under em Giuseppe Garibaldi in drei Unabhängigkeitschrieg verwirkligt worde. Am 17. Merz 1861 isch dr Viktor Emanuel II. z Turin zum König vo Italie usgrüeft worde. Bis zu siim Dod 1878 het er as e konstitutionelle Monarch dr Nationalstaat Italie regiert, wo Sardinie und Piemont Brovinze drvo gsi si.

Familie

Am 12. April 1842 het er z Stupinigi d Erzherzogin Adelheid vo Östriich gh[rotet, e Dochter vom Erzherzog Rainer vo Östriich, Vizekönig vo Lombardo-Venetie, wo e jüngere Brueder vom Kaiser Franz I. vo Östriich gsi isch.

Er het mit ere die Chinder gha:

• Clothilda Maria (* 2. Merz 1843; † 25. Juni 1911) ∞ Napoléon Joseph Charles Paul Bonaparte (1822–1891), wo men em Plon-Plon gsait het
• Umberto I. (* 14. Merz 1844; † 29. Juli 1900), König vo Italie
• Amadeus I. Ferdinand Maria (* 30. Mai 1845; † 18. Januar 1890), König vo Spanie
• Oddone Eugenio (* 11. Juli 1846; † 22. Januar 1866), Herzog vo Montferrat
• Maria Pia (* 16. Oktober 1847; † 5. Juli 1911) ∞ 1862 Ludwig I., König vo Portugal
• Carlo Alberto (* 2. Juni 1851; † 28. Juni 1854), Herzog vo Chablais
• Vittorio Emanuele (*/† 7. Juli 1852), Brinz vo Savoye
• Vittorio Emanuele (* 8. Januar 1855; † 17. Mai 1855), Herzog vo Chablais

In ere zweite morganatische Hürot isch er mit dr Rosa Vercellana verhürotet gsi, mit ihre het er zwei Chinder gha

• Vittoria (* 3. Dezämber 1848; † 29. Dezämber 1905), Gräfin de Simone,
• Emanuele Alberto (* 26. Juni 1851; † 23. Dezämber 1894), Graf vo Mirafiori

Zuesätzlig isch er Vater von ere unehelige Dochter gsi:

• Maria Pia (* 25. Februar 1866; † 19. April 1947) Gräfin Montecuccoli