Turan Schah

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Dr al-Malik al-Mu'azzam Turan Schah (arabisch الملك المعظم توران شاه بن صلاح الدين يوسف بن غياث الدين محمد, Umschrift: al-Malik al-Muʿaẓẓam Tūrān Šāh b. Ṣalāḥ ad-Dīn Yūsuf b. Ġiyāṯ ad-Dīn Muḥammad; gstorbe 1. Mai 1250) isch dr sibt und letscht herrschend Sultan vo de Ayyubide z Ägypte gsi. Er het im Johr 1250 regiert.

Dr Turan Schah het noch em Dod vom as-Salih Ayyub (1240–1249) mit Hilf vo siiner Stiefmueter Schadschar ad-Dur d Dronfolg vo Ägypte adräte. Er het sich zerst mit de Chrüzfahrer vom Sächste Chrüzzug, wo z Ägypte glandet si und d Festigsstadt Damiette eroberet hai, müesse usenandersetze. D Chrüzfahrer si in Richtig Kairo vorgstosse und hai al-Mansura belageret, si aber schliesslig zum Rückzug zwunge worde und am 6. April 1250 isch e grosse Deil vo ihrer Armee gfangegnoh worde, drunder au ihre Afüehrer, dr König Ludwig der Heilig. Gege d Zahlig vom ene Lösigäld vo 800.000 Dinar und dr Rückgob vo Damiette hai d Chrüzfahrer schliesslig nach Akkon dörfe abzieh.

Drotz däm grossen Erfolg het d Herrschaft vom Turan Schah nit lang duurt. Won er noch em Siig über d Chrüzfahrer brobiert het, dr Iifluss vo de Mamelukedruppe z begränze, isch er am 1. Mai 1250 vor Damiette vom Mamlukenemir al-Faris Aqtay ermordet worde. Dr Dod vom Turan Schah het faktisch s Änd vo der Dynastii vo de Ayyubide bedütet. Zwar het d Witwe vom As-Salih, d Schadschar ad-Dur (1250–1257), noch ihm gregiert, aber d Macht isch immer meh vom Mamluk Aybak überno worde und me zellt ihri Regierigsziit zu dr Mamelukeziit.



Dä Artikel basiert uff ere fräie Übersetzig vum Artikel „Turan_Schah“ vu de dütsche Wikipedia.

E Liste vu de Autore un Versione isch do z finde.