Trapez (The Catch Trap)

Dialäkt: Vorarlbärgisch

Trapez (The Catch Trap)
Orginalusgob
Orginaltitel	The Catch Trap
Genre	Roman
Autor	Marion Zimmer Bradley
Orginalsproch	Änglisch (US)
Erschinigsjoor	1979
düütschi Uusgob
Buechtitel	Trapez

Trapez (englisch ussako 1979 als The Catch Trap) isch an Roman vo Marion Zimmer Bradley, na US-amerikanischa Schriftstellere. (A komplette Lischte vo era siina Bücha gits do).

Trapez isch sicha oans vo Marion Zimmer Bradley’s schönschta Büacha. Agsiedlt 1944 – 1953 vazellt s d’Gschicht vo nara italo-amerikanischa Zirkusfamilie, wo sit vier Generationa untam Nama Flying Santellis als oa vo da beschta und berühmtatschta Trapezkünschtla in da USA schaffan. Mario Santelli isch oana vo da weniga Fliaga zu dera Zit, wo da drüfache Vorwärtssalto, da „salto mortale“ güabt und o künna hot. Salto Mortale, tödlicha Salto“, hoasst a drum, wiil dean bloss a Handvoll Künschtla uf da Wealt künna hond und se bim Üaba viele valetzt hond oda dabi gschtorba sin.

Ibettet in dean Rahma us faszinierendam Zirkusleaba spielt a Liebesgschicht zwüschat eba deam Mario Santelli und Tommy Zane, Sohn vom Raubtierdompteur, wo als jüngschta Fliaga in dia Santelli-Familie ufgno wird. Wiil Tommy am Afang vo da Beziehung knapp fuchzehn isch, isch s net nur a homosexuelle Beziehung sondan scho fasch päderastisch – und des zu na Zit, wo Homosexualität in vielna Lända ned bloss totgschwiega, sondan an Straftatbeschtand gsi isch. Ma leabt mit mit Mario und Tommy, mitm net-zoaga-dürfa vo siina Gefühle, mit da Angscht, dass s jemand merka künnt, Ablehnung und Vorurteile o us da oagana Familie und da engschta Umgebung, Lebensgefahr durchs Schaffa ufm Trapez, erwachsa wera und sin oagana Weag finda.

Und rund ummatum s Leaba vo da ganza temperamantvolla Familie, Glorie und Niedagang vom Zirkus als Unterhaltungsinschtitution bevors Fernseha und Kino gea hot, s Bild vo nara Zit dia vorbei isch, aba üsan Geischt und üsre Kultur bis hüt prägt.