Tomba François (Volci)

Us der alemannische Wikipedia, der freie Dialäkt-Enzyklopedy
Hops zue: Navigation, Suech

D Tomba François isch s Grabmool vo de etruskische Famili Saties i de Nekropole vo Volci usem spoote 4.Jh.v.Chr. D Tomba François isch 1857 vom Archäolog Alessandro François erforscht wore. Si bifindet sich hüt i de Villa Albani z Rom.

Freske[ändere | Quälltäxt bearbeite]

D Tomba François isch mit guet erhaltne Freske uusgmoolet wore. E paar Freske bildet e Champfszene mit föf Manepaar. S Paar linksusse zaigt de Macstrna, wien er em Caile Vipinas d Handfessle döreschniidet. Denn chömed zwoo Abbildige, wo je e Maa sin Gegner tötet. Die viert Gruppe zaigt de Avle Vipinas, wien er e Gegner tötet und s föfti Bild rechtsusse zaigt, wie de Marce Camitlnas de Cneve Tarχunies Rumaχ ermordet.

Ganz links: de Macstrna bifrait de Caile Vipinas. Ganz rechts: de Marce Camitlnas tötet de Cneve Tarχunies Rumaχ.


Noch de römische Öberliferig isch de Mastarna (etr. Macstrna) zäme mit em Brüederpaar Caeles und Aulus Vibenna (etr. Caile & Avle Vipinas) uf Rom choo, um em König Lucius Tarquinius Priscus z helfe, wo aber uf Aastifte vo de beede Söö vom Ancus Marcius ermordet woren isch. De Mastarna isch denn as Servius Tullius König vo Rom wore.

De Cneve Tarχunies Rumaχ vom Fresco werd mengisch mitem römische König Lucius Tarquinius Priscus gliichgsetzt, wegem andere Praenomen werd aber au agnoo, s handlet sich um e Verwandte vom König, wo uf latiinisch Gnaeus Tarquinius Romanus haisse müesst, aber sus niene gnennt werd. De Mörder, de Marce Camitlnas isch woll e Soo vom Ancus Marcius. Die Szene illustriert aso e Szene us de Gschicht vo de römische Königszitt.