Thomas Chaucer

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Disambig.svg Dä Artikel behandlet dr Sprächer vom änglische Parlament Thomas Chaucer. Für anderi Bedütige vo Chaucer lueg do

Dr Thomas Chaucer (* ca. 1367; † 18 November 1434) isch der ältischt Sohn vom berüehmte Dichter Geoffrey Chaucer und siiner Frau Philippa Roet, Dochter vom Sir Payne Roet und Schwöschter vo dr Catherine Swynford, dr Mätresse und denn Frau vom John of Gaunt, Herzog vo Lancaster, gsi. Si Frau het groossi Ländereie mit in d Eh brocht, die wichdigschd drvo s Landguet vo Ewelme in Oxfordshire.

Läbe[ändere | Quälltäxt bearbeite]

Er het schon früeh d Mathilda, die zweiti Dochter vom John Burghersh, Lord Kerdeston, em Neveu vom Henry Burghersh, Bischof vo Lincoln, Schatzmeischter und Kanzler vom Königriich, ghürotet. Die Verwandtschaft und die mit em John of Gaunt het sich sehr günschtig uf si Karriere usgwürkt. Am Hof vom Richard II. het er dr Boschde vom Hauptmundschänk gha mit erä Ränte vo 20 Mark. Er isch Konnetabel vo Wallinford Castle und Hofmeischder, und für die und anderi Positione het män em £40 im Johr zahlt und £10 für ä Schdellverdräter. 1402 isch er zum Scheriff vo Berkshire und vo Oxfordshire ernennt worde. Zu dere Ziit het er au s Amt vom königliche Förschder vo North Petherton Park übercho, wo scho si Vater bsetzt gha het und er isch Hauptmundschänk für siis ganze Läbe worde. 1411 het em d Königin s Guet vo Woodstock gschänggt.

Vo 1400 bis 1431 isch er Parlamentsmitgliid und ä baar mol au Schbrächer vom House of Commons gsi, in erä Ziit, wo s Parlamänt siini Rächt het müesse verdeidige em König gegenüber. So hai si an dr Sitzig vo 1407 z Gloucester dr König dra erinneret, ass er em Parlamänt d Abrächnig für s Budget, won er übercho het, nonig usgliiferet haig. Dr Kanzler het en underbroche und gsait, ass d Abrächnig nit barat sig und ass in Zuekumft mä nüm wurd verschbräche si z veröffentliche. Wo dr Chaucer 1410 und 1411 widr gwehlt worden isch, het er, wie mä s immer gmacht het, d Erlaubnis verlangt, frei dörfe z rede. Dr König het em d Antwort gä, ass er dörf rede wie anderi Schbrächer vor ihm au, aber nid meh as das. Dr Dag druf het sich dr Chaucer endschuldigt. 1413 isch dr Heinrich IV. gschdorbe und si Sohn, dr Heinrich V., uf ä Dron cho. S Johr druf isch dr Chaucer widr zum Schbrächer gwehlt worde und het au vom König dr Ufdrag übercho, as domicellus si Hürot z arrangiere.

1415 isch er em König mit zwölf Ritter und 37 Bogeschütze, won er sälber zahlt het, noch Frankriich gfolgt und isch in dr Schlacht vo Agincourt drbii gsi. 1417 het er dr Uftrag übercho, mit Frankriich Friidensverhandlige azfoo. 1417, under em Heinrich VI. , isch er as dr königlich Hauptmundschänk abgelöst, churzi Ziit druf aber widr iigesetzt worde. Dr Heinrich VI het em Thomas Chaucer s Wallingford Castle gä. 1431 isch er Teschtamäntsvollschdrecker vo dr Herzogin vo York gsi. As sehr wohlhabende Ma, wo der König Gäld für ä Chrieg gege Frankriich het lo ufdriibe, isch er uf erä Schbändelischte mit £200, dr höggschte Einzelspänd, iidrait gsi. Er isch am 14. März 1434 as hochagsehne Ma gschdorbe und z Ewelme begrabe worde.

Nochfahre[ändere | Quälltäxt bearbeite]

Er het ä Dochter, d Alice, gha won er im Alter vo elfi mit em Sir John Philip verhürotet het, as Wohnsitz het er nä s Schloss Donnington kauft. D Eh isch aber nie vollzoge worde, wil dr Sir John im gliiche Johr gschtorbe isch. In zweiter Eh het si dr Thomas Monacute, 4th Earl of Salibury, ghürotet, mit welem si keini Chinder gha het. Die dritti Eh het si mit em William de la Pole abgschlosse, Earl und denn Herzog vo Suffolk, emä Chriegsheld, wo 1450 vo dr Jeanne d'Arc gefangegno und schböter köpft worden isch. Dere Eh entschtamme zwei Söhn und ei Dochter. Der ältischt Sohn het in erschter Eh die schböteri Königsmueter, d Margaret Beaufort, ghürotet.

Quelle[ändere | Quälltäxt bearbeite]