Tarquinius

Us der alemannische Wikipedia, der freie Dialäkt-Enzyklopedy

Tarquinius (etr. Tarχunies; uf tütsch au Tarquinier) isch de Name vomene römisch-etruskische Gschlecht gsii. A dere Famili ghöred zwee König vo Rom aa.

Herchoo[ändere | Quälltäxt bearbeite]

Noch de römische Saag, stamed d Tarquinier vo de Bakchiade ab, em Tyrannegschlecht vo Korinth. Deno isch de Demaratus ane 657 v. Chr., nochdem d Bakchiade gstürzt wore sind, vo Korinth uf Tarquinii gfloche und het denn en adligi Etruskeri ghüroote. Er het zwee Söö ghaa, de Arruns Tarquinius und de Lucius Tarquinius de Frommi, wo vo 616 bis 578 König vo Rom gsii isch. Nochem Sturz vom letzte römische König, em Lucius Tarquinus de Stolzi, ane 507 v. Chr. sind d Tarquinier us Rom vertribe wore.

Vom Name her chönet d Tarquinier mit de etruskische Stadt Tarquinii (etr. Tarχna) verbunde were und mitem Tarchon, wo de Bund vo de etruskische Zwölfstädt is Lebe grueffe het. De Name werd vo de moderne Wüsseschaft au mit em hethitische Wettergott Tarḫunna i Verbindig brocht.

Mitglider[ändere | Quälltäxt bearbeite]

  • König Lucius Tarquinius Priscus ("de Fromm") isch de föft König (616-578) vo Rom gsii und de Maa vo de Caecilia Tanaquil (etr. Θanaχvil). Bivor er König woren isch, het er Lucumo (etr. lauχume "König") ghaisse. Er het vier Chinder ghaa.
  • Gnaeus Tarquinius Romanus ("de Römer"; etr. Cneve Tarχunies Rumaχ) chunnt i de offizielle Gschicht vo Rom nöd vor, werd aber imene etruskische Fresko us Volci abbildet. Denno werd agnoo, as nochem Tod vom L. Tarq. Priscus zu Thronstrittigkaite cho isch, wobi de Gnaeus tötet woren isch und de Servius Tullius (578-534) König woren isch.
    • Tarquinia isch d Töchter vom L. Tarq. em Fromme gsii und d Frau vom sechste römische König Servius Tullius. Si isch d Muetter vo de zwoo Tullia.
    • Tarquinia isch en anderi Töchter vom L. Tarq. Priscus. Si isch d Muetter vom Lucius Iunius Brutus, wo zäme mitem L. Tarq. Collatinus ane 510/9 de erst römisch Konsul gsii isch.
    • Arruns Tarquinius isch e Soo vom L. Tarq. em Fromme gsii. Er isch vo sim Brüeder ermordet wore.
    • König Lucius Tarquinius Superbus ("de Stolz") isch de sibet und letscht König (534-507) vo Rom gsii. Er het d Tullia, d Töchter vo de Tarquinia und em Servus Tullius ghüroote. Er het vier Chind ghaa:
      • Tarquinia het de Octavus Mamilius ghüroote, de Först vo Tusculum. Si isch d Muetter vom Lucius Mamilius gsii, em Diktator vo Tusculum.
      • Titus Tarquinius isch König vo Signia gsii
      • Sextus Tarquinius isch König vo Gabii gsii. Wel er d Lucretia vergwaltig het, sind d Tarquinier us Rom vertribe wore..
      • Arruns Tarquinius isch König vo Circei gsii. Er isch bim Versuech d Macht vo de Tarquinier z Rom widerherzstele umchoo.

Zwiig vo de Collatini[ändere | Quälltäxt bearbeite]

  • Arruns Tarquinius isch de Soo vom Demaratus gsii und de Vatter vom Arr. Tarq. Egerius Collatinus.
    • Arruns Tarquinius Egerius Collatinus isch de König vo Collatina gsii. Er isch de Enkel vom Demaratus und de Grossvatter vo de Tarquinia.
      • De Name vom Soo vom Arr. Tarq. Egerius isch nöd öberliferet.
        • Lucius Tarquinius Collatinus, Enkel vom Arr. Tarq. Egerius Collatinus und Brüeder vo de Tarquinia. Er isch König vo Collatina gsii und ane 510/9 de ersti römischi Konsul. Noch de endgültige Vertriibig vo de Tarquinier het er uf sini Ämter müese verzichte. Er het d Lucretia ghüroote, d Töchter vom Spurius Lucretius Tricipitinus.
        • Tarquinia isch d Muetter vo de zwee Aquilii gsii.

Spööteri Tarquinier[ändere | Quälltäxt bearbeite]

  • Publius Tarquinius und Marcus Tarquinius sind zwee Brüedere us Laurentum gsii, wo 500 v. Chr. e Verschwöörig vo Sklave verroote hend.
  • Lucius Tarquinius Flaccus isch ane 458 v. Chr. magister equitum gsii.
  • Lucius Tarquinius het ane 63 v. Chr. a de Catilinarische Verschwöörig tailgnoo.

Büecher[ändere | Quälltäxt bearbeite]

  • Der Neue Pauly, Bd. 12/1: Tarquinius