Tanaquil

Us der alemannische Wikipedia, der freie Dialäkt-Enzyklopedy

D Gaia Caecilia Tanaquil (etr. Θanaχvil; agr. Τανακυλλίς, Tanakyllís) isch d Frau vom römische König Lucius Tarquinius Priscus gsii.

D Tanaquil isch e vornemi Etruskeri vo de Stadt Tarquinii gsii. Si het de riichi Lucomo ghüroote, wo e Soo vom Griech Demaratus und vonere adlige Etruskeri gsii isch. S Paar het bischlosse uf Rom z goo. Wo si dai achoo sind, het en Adler d Chappe vom Lucomo gschnappt und em aber grad wider uf de Chopf gsetzt. D Tanaquil won e waisi Woorsegeri gsii isch, het em drufabe prophizait, er werdi König vo Rom werde und si het em au agroote, astell vo Lucomo de römisch Name Lucius aznee.

Noch de Ermordig vom Lucius Tarquinius het si dör List erraicht, as ere Günstling, de Servius Tullius, zum König gwäält woren isch.