S Stroossburger Dänggmol

Us der alemannische Wikipedia, der freie Dialäkt-Enzyklopedy
S Stroossburger Dänggmol
Dialäkt: Baseldütsch

S Stroossburger Dänggmol stoot in Baasel uf em Zentralbaanblatz bim Baanhoof Baasel SBB und erinneret an die humanitääri Rolle, wo d Schwizer bi dr Belaagerig vo Stroossburg im Dütsch-Franzöösische Chrieg gspiilt häi.

S Dänggmol isch vom Frédéric Auguste Bartholdi 1895 gmacht worde. Gstifdet het s dr franzöösisch Baron Hervé de Gruyer zum Dank drfür, ass d Schwizer de Iiwooner vo Stroossburg ghulfe häi, wo d Stadt im Dütsch-Franzöösischen Chrieg schwer bombardiert worde isch. Verdräter vo de Stedt Baasel, Bärn und Züüri häi mit dr badische Regierig so lang verhandlet, bis si d Erlaubnis überchoo häi, 1400 Fraue, Chinder und Alti us dr belaagerete Stadt in d Schwiz z bringe.

D Figuregrubbe uf em Dänggmol stellt en Ängel daar, wo Fraue und Chinder beschützt. Die bäide Reliefdaafele if em Soggel zäige d Hilf in dr zerstöörte Stadt mit dr Inschrift: „A la Suisse hommage reconnaissant d'un enfant de Strasbourg 1871“ und d Faart mit em Hirsebreidopf vo 1576 mit dr Inschrift: „Le culte des traditions d'amitié honore les peuples comme les hommes“. Im Joor 1576 häi d Äidgenosse nämlig e Rekordfaart vo Züüri bis uf Stroossburg gmacht, zum z zäige, wie schnäll iiri Hilf im Notfall chönn sii.

Litratuur[ändere | Quälltäxt bearbeite]

Über d Kwelle vo de bäide historische Hirsebreifaarte orientiert:

  • Jakob Baechtold: Das glückhafte Schiff von Zürich. Nach den Quellen des Jahres 1576. Zürich: Orell Füssli 1880 (=Mittheilungen der Antiquarischen Gesellschaft in Zürich, 20, Abtheilung 2, Heft 2 und Neujahrsstück, 44/1880).

Weblingg[ändere | Quälltäxt bearbeite]

 Commons: S Stroossburger Dänggmol – Sammlig vo Multimediadateie

Koordinate: 47° 32′ 56,33″ N, 7° 35′ 27,24″ O; CH1903: 611463 / 266484