Steer

Us der alemannische Wikipedia, der freie Dialäkt-Enzyklopedy
En Ruummeter Meterholz entsprecht amene Steer

De Steer (st; dütsch Ster, französisch stère, italienisch stero) oder Ruummeter (rm) isch es Ruummaass för Holz und di gebrüchlichschti Maassainhait bim Handel mit Brännholz. En Ruummeter (1 rm bzw. 1 Steer) entsprecht amene Würfel vo aim Meter (1 m) Sitelängi, also amene Ruuminhalt vo aim Kubikmeter (1 m³), gschichteti Holzstuck (unbestimmti Längi), mit sammt de Zwüscherüüm i de Schichtig. De Steer isch es älters Ruummaass, wo vorallem i de Dütschschwiz und im Süde vo Dütschland bruucht wörd.[1] Es entsprecht amene Ruummeter Holzschitter (vo 1 Meter Längi), wo gschichted im Wald oder bim ene Holzhändler glaagered send. Frisch gfällts Holz im Wald hät öpe 50 % vom Gwicht no Wasser dinne, noch sächs Mönet Laagerig häts nu no öpe 20 % Wasseraatail.[2]

De Schüttruummeter (srm) entsprecht ennere los gschüttete Holzmängi vo aim Kubikmeter.

En Kubikmeter Holz ohni Zwüscherüüm isch de sogenannti Festmeter (fm). Wil en Steer Holz äbe Zwüscherüüm hät, entspräched eme Steer öpe 0,65 bis 0,75 m³ Holzmasse und händ e Gwicht im tröchnete Zuestand vo öpe 450 kg.[3]

Früener isch au s Chlofter als Ruummaass för s Schichtholz bruucht worde. Je noch Region entspräched 3 oder 4 Steer emene Chlofter.[4]

Lueg au[ändere | Quälltäxt bearbeite]

Fuessnoote[ändere | Quälltäxt bearbeite]

  1. Woher stammen die Massbezeichnungen Ster und Klafter? Radio DRS 1, Sändig Mailbox vom 11. November 2008
  2. Bayerische Landesanstalt für Wald und Forstwirtschaft: Scheitholz uf lwf.bayern.de, abgruefe am 17. Februar 2015
  3. Allgemeinde Informationen uf de Website vo «Achters Holz», abgruefe am 17. Februar 2015
  4. Ster (Raummeter) im Historische Lexikon vo de Schwiz, abgruefe am 17. Februar 2015