Statik

Statik (vo gr. statikos, „wo zum Stillstand bringt“) isch dr Name vo Deilgebiet vo dr Physik, wo sich mit nit bewegter Materie befasse. In dr Technik wird dr Begriff im Bauwäse bruucht, wo d Berächnig vo reale statische System umfasst.

In dr Physik

Statik

Bispil vom enä statische Balkesystem (Zeichnig ganz obe), wo linggs los und uf dr rächte Siite fest glageret isch. D Summe vo de Chreft (Formle linggs) und vo de Momänt (Formle rächts) muess Null si. S Chreftdiagramm (linggs), wo alli Chraftvektore zeigt, isch gschlosse, d. h. es git kei Chraft, wo s System wurd beschleunige. S Momäntdiagramm (rächts) zeigt, ass alli Dreimoment im Uhrzeigersinn gliich de Dreimomänt gege dr Uhrzeigersinn si und sich so ufhebe.

D Statik isch es Deilgebiet vo dr Mechanik. Si beschribt System vo ruehende Körper und d Chreft wo uf se wirke. Für dass sich die System nit verändere, müesse d Summe vo allne Chreft und Dreimomänt, wo uf jede Körper wirke, gliich Null si. Wenn das nit dr Fall isch, het mä es dynamischs System vor sich.

Elektrostatik

D Elektrostatik isch ä Deilgebiet vo dr Elektrodynamik und befasst sech mit elektrische Ladige, wo sech nit bewege. Si beschribt d Chreft, wo sonigi Ladige ufenander usüebe.

Baustatik

D Baustatik, hüfig churz Statik, befasst sich mit em Berächne vo unbeweglige Tragstrukture und dr genaue Definiton vom Tragsystem, so dass es im stabile Gliichgwicht isch. Dodrfür bruucht si d Formle vo dr mechanische Statik us dr Physik. D Bruefsgattig, wo sich mit däm Thema befasst isch dr Bauäscheniör. In dr Schwyz kha me dä Bruef vorallem an dr ETH Züüri studiere.

Architektonischi Relevanz

Für än Archidekt, wo sich sich ehnder mit dr Form und em Uusdrugg vom Gebäud befasst, spiilt d Statik insofärn ä Rolle, ass si Gränze festleit, was mit wele Materialie wie cha baut wärde. Die genaue statische Berächnige wärde im Allgemeine vom Statiker gmacht und nit vom Archidekt.