St. Fridolin

Us der alemannische Wikipedia, der freie Dialäkt-Enzyklopedy
Hops zue: Navigation, Suech

De Fridolin oder Sant Fridli isch e Missionar bi de Alemane gsii. Er het um d Mitti vom 7. Joorhundert glebt und s Nonnechloster Säckinge ggründet und isch de Schutzhailig vom Glarnerland. Si Gidenktag isch de 6. Märze.

s Lebe[ändere | Quälltäxt bearbeite]

D Fridolin isch ageblich vo Irland uf Gallie choo und het z Poitiers s Grab vom Hailige Hilarius wider hergstellt. Nochere gwüsse Zitt isch em de Hilarius erschine und het en uufgforderet, vo sim Körper Reliquie abztrenne und uf Alemannie z goo, und dai en Insle im Rhii uufzsueche.

De Fridolin isch denn a d Mosel choo und het bim Fluss e Chloster gründet. Im Elsass het er z Stroosburg d Hilarius-Chile gründet und e zwaiti i de Vogese. Druf abe isch er uf Chur und het dai e witteri Hilarius-Chile gstiftet.

Schlussendli isch er uf Säckinge choo und het dai im Rhii di gsuechti Insle gfunde. Won er aber het afange d Insle undersueche, sind di Iihaimische aargwöönisch wore und hend en vertribe. De Fridolin isch zum König ggange und de het em denn di ganz Insle gschenkt. Er isch denn zrugg und het afange mit sinene Biglaiter d Insle rode und Zelle baue. Er het e witteri Hilarius-Chile errichtet und s Nonnechloster Säckinge (lat. Secanis) ggründet.

De Fridolin het ab denn bis as End vo sim Lebe z Säckinge gwürkt und isch amene 6. März gstorbe, s Joor isch nöd bikannt. Mengisch werd aber s Joor 538 aaggee, aber da isch aidüttig z früe.

d Ursus-Legende[ändere | Quälltäxt bearbeite]

s Woppe vum Kantuu Glaris

E spööteri Legende brichtet as de Glarner Grundbsitzer Ursus em Fridolin Länderaie im Tal Glarus vermacht het. Aber, nochdem er gstorben isch, het sin Brüeder die Länderaie för sich ii Aaspruch gnoo. Well de Richter gmaint het, de Fridolin heb nu Aarecht uf de Grundbsitz, wenn de Schenker da vorem Gricht persönlich bistätige tüeg, isch de Fridolin as Grab vom Ursus und het de zum Lebe erweckt. Er isch denn mitem Gripp vom Ursus vor em Gricht erschine und de toot Ursus het mit sim Brüeder gschumpfe und d Schenkig bistätigt. De Brüeder het drufabe biroit und em Fridolin no mee Land gschenkt. Us dem Grund werd de Fridolin hüüfig dargstelt, wien er e Gripp a de Hand füert. Er isch drum au de Schutzhailigi vom Glarnerland und im Woppe vom Kantoo Glarus abbildet.