Speyerer Linie

Us der alemannische Wikipedia, der freie Dialäkt-Enzyklopedy
Hops zue: Navigation, Suech
D Benrather un d Speyerer Linie

Speyerer Linie oder Appel/Apfel-Linie wird in dr Sprochwisseschaft d Isoglosse gnännt, wu verschobene pf im Inlut vum uuverschobene pp drännt. In dr Dialäkt nerdlig vu däre Linie sait mer Appel, kloppen, stoppen, sidlig sait mer Apfel, klopfen, stopfen. D Speyerer Linie goht e baarmol iber dr Main, wäge däm isch si zem Dail au Main-Linie gnännt wore.

Die Isoglosse wird hit in dr Germanistik as Gränze zwische dr mitteldytsche un dr oberdytsche Dialäkt aagsääne.

D Speyerer Linie verlauft zem Dail parallel zue dr Germersheimer Linie (Pund/Pfund-Linie), in dr Literatur wird nit immer klar unterschide zwische däne bode Isoglosse.

Verlauf[ändere | Quälltäxt bearbeite]

D Speyerer Linie isch Dail vum Ryynische Fächer. Si goht vu dr Vogese uus, fascht idäntisch mit dr Germersheimer Linie bis uf Germersheim. Dert dränne sich di bode Linie, d Speyerer goht derno im Side vu Speyer iber dr Ryy un bi Eberbach iber dr Neckar. Bi Gemünden drifft si wider uf d Germersheimer Linie un verlauft derno zämme mit däre bis uf Vacha, wu si sich wider dränne. Bi Faulbach, Freudenberg un Großheubach goht d Speyerer Linie e baar mol iber dr Main, derno uf dr linke Spessartsyte bis zue dr Rhön. Iber dr Thüringer Wald, s Elstergebirg un s Erzgebirg, chunnt si im Side vu Karlsbad an di dytsch-tschechisch Gränze un doermit an di hitig Oschtgränze vum dytsche Sproochruum. Friejer isch si no wyter gange bis uf Pilsen.