Sita

Us der alemannische Wikipedia, der freie Dialäkt-Enzyklopedy
d Sita biwiist i de Füürproob eri Uuschuld

D Sita (Sanskrit: सीता, Sītā f.) isch i de hinduistische Saag d Frau vom Rama und gelt as Inkarnation vo de Göttin Lakshmi.

s Lebe[ändere | Quälltäxt bearbeite]

D Sita isch bim Pflüege us de Erde uuftaucht und denn vom König Janaka as Tochter agnoo wore. Er hett si groosszoge und denn mitem Rama verhürootet. Wo de Rama is Exiil het müese, isch si em as troiji Frau in Wald gfolgt und het dai glebt. Wo de Rama uf de Jagt gsii isch, isch si vom Dämoon Ravana entfüert wore. Er het si i sinnere Stadt iigsperrt und vo ere verlangt, ass er si hürooti, aber si het sich em verwaigeret. De Rama isch zäme miteme Heer us Affe und Bääre gege d Insle Lanka zoge, wo de Ravana König gsii isch. Em Hanuman isches gglunge, d Sita z rette und de Rama het de Ravana bisigt. Nochdem d Sita wider hai zum Rama choo isch, het er si bischuldigt, as si em untroi wore sai. Si het da abgwert und sich is Füür gsetzt, um z biwiise, as si uuschuldig isch. De Rama het drufabe sini Bischuldigunge biroit, aber d Sita het sich zruggzoge und isch im End wider i de Erde verschwunde.

Büecher[ändere | Quälltäxt bearbeite]

  • Hans Wilhelm Haussig (Hg.): Götter und Mythen des Indischen Subkontinents. Stuttgart: Klett-Cotta (1984). ISBN 3-12-909850-X