Silbe

Die Selbe (v. lat.: syllaba, griech.: συλλαβή "Zusammenfassung". Do: Zfg. vo Lute oder Phoneme) esch e grammatische beziehigswies linguistische Begreff, wo e Einheit us enemene oder mehrere ufenanderfolgende Lut (Phoneme) bezeichnet, wo sich in eneme Zug usspräche lönd (Sprächeinheit). Sie stellt die chlinschti Lutgroppe im natürleche Sprächfloss dar. Sie esch e phonetischi ond kei Senneinheit. Das bedüted, dass die Iteilig in Selbe oft ned met de Iteilig i bedütigstragende Einheite (Morpheme) öberiestemmt. Au wenn im Dütsche oft de Idrock entstohd, dass die Morphemgränze met de Selbegränze öberistemmt, esch das ned de Fall, do e Selbe e eigene inhärenti Struktur besetzt. Mängisch wärdid Morpheme au als Sprochselbe bezeichnet ond denn die do beschriebene Selbe zor Verdütlechig als Sprächselbe. Danäbe werd mängisch au e Schriebselbe definiert.