Selber drülle

Us der alemannische Wikipedia, der freie Dialäkt-Enzyklopedy

Selber drülle isch e Filmwettbewärb, wu anne 2012 z Löörech stattgfunde het. Veraastaltet wore isch dää Wettbewärb vum glychnamige Verain, wu im Oktober 2011 vu dr Linda Sepp un dr Maren Schrader zämme mit em Elias Füchsle un em Matthias Klimkait grindet woren isch.

D Schrader het Kultur- un Mediepedagogik z Halle studiert, d Sepp het z Locarno ne Ussbildig zur Schauspiileri gmacht. Si hän sich iber s Theater chänneglehrt. Wu si vun eme Theaterprojäkt mit em Zug haimgfahre sin, isch ene d Idee zue däm Churzfilmfeschtival chuu.

Zum Wettbewärb hän Churzfilm chenne yygee wäre, wu uf Alemannisch gschwätzt wird un wu nit lenger sin wie sibe Minute gange. Finanziäll unterstitzt wore isch die Veraastaltig vum Landrotsamt Löörech.

Insgsamt sin elf Film yygee wore, zum Weetbewärb zuegloo wore sin dervu zeh. Dr elft isch z lang un nit uf Alemannisch gsii.

Am Samschtig, 7. Juli 2012 sin d Film im große Saal, im Foyer un im Café vum Alte Wasserwerch z Löörech in eme Ändlosschlupf vorgfiert wore. S Publikum het chenne Stimme vergee un s het au ne Jury gee, wu us drei Lyt bstanden isch, em Dichter Markus Manfred Jung, em Filmstudänt un Jungregisseur Christoph Gutmundsson un em Michele Giannini vum „Free Cinema“.

Gwunne het dr Film "Ausflug zu dritt" vu L. Geling, l. Weidenmüller un K. Sepp, dr Publikumsbryys isch an s Ehbaar Jundt fir dr Film "Bim Barbier" gange.

Weblink[ändere | Quälltäxt bearbeite]