Seduner

Us der alemannische Wikipedia, der freie Dialäkt-Enzyklopedy
Hops zue: Navigation, Suech

D Seduner (lat. Seduni) sind en keltische Stamm im Wallis gsii. De name isch Gallisch und bidütet Sesshafti.

D Seduner hend im mittlere Wallis gsidlet und ire Vorort isch Sedunum (hüt Sittu) gsii. Archäologisch chamer si för s 1.Jh.v.Chr. guet vo irne binochburte Stämm underschaide ahand vo Armring wo i Schlangechöpf uslaufet. Denoo hend si im Oste bis zum Pfynwald glebt und im Weste bis is Tal vom Flüssli La Morge.

Ane 57 v.Chr. hend si a de binochburte Veragrer gege d Römer ghulfe und die bisigt. Si sind denn underem Chaiser Augustus im Alpefeldzug vom Drusus und Tiberius underworfe worde und is Römische Riich iiglideret wore. Zäme mit de Nantuate, de Veragrer und de Uberer hend si denn en Bund bildet (quattuor civitates vallis Poeninae), wo zu de Verwaltigsainhait Raeti Vindelici vallis Poeninae ghört het. Underem Chaiser Claudius (41–54) sind die vier Stämm zu de civitas Vallensis zämegschlosse wore und zu de Provinz Alpes Graiae et Poeninae choo. Nochem Undergang vom Römische Riich isch s Wallis zum Burgunderriich cho und Sedunum isch Bischofssitz wore.

Büecher[ändere | Quälltäxt bearbeite]