Schweizer Franken

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Schwiizerfranke
Land/Länder SchweizSchweiz Schwiiz
Liechtenstein Liechteschtei
Underdeilig 100 Rappe
Abchürzig Fr.
Abchürzig (ISO-4217) CHF
Wechselkurs
(16. Juli 2012)
1 EUR = 1,201 CHF
1 CHF = 0,83264 EUR
1 CHF = 1,0139 USD
Im Umlauf sit 1850
Chleinsti Münze 5 Rappe
Gröschte Schyn 1000 Franke

De Schwiizerfranke isch d Wärig vo de Schwiiz un vo Liechtestei (sit 1924). Er wird i hundert Rappe iiteilt.

Dr Franke wird au in de Exklave Campione (Italie) und Büesinge (Dytschland) verwändet, au wenn die offizielli Wäärig dort dr Euro isch.

Gschicht[ändere | Quälltäxt bearbeite]

Im Staatebund vo der Alte Edgenosseschaft het es kä äinhäitlichs Gäld ge. Verschidnigi Stedt und Landeshäre händ es Münzrächt gha. Won 1798 di hütigi Schwiiz vo de Franzose bsetzt worden isch und die di Helvetischi Republik uusgruefe händ, e Zentralstaat wien Frankriich, isch au e äinhäitlichi Währig für die neui Republik iigfüert worde. Säb Gäld häd wien z Frankriich Franke ghäisse. Mit de neue Verfassig vo 1803, de Mediationsakte, händ d Kantön d Münzhohäit übercho und jede Kanton het sis äigete Gäld präägt.

Erscht nach emen Bürgerchrieg, em Sonderbundschrieg, isch 1848 di hütigi Schwiiz als Bundesstaat gründet worde. Sit dänn isch dr Bund au fürs Gäld zueständig. S erschti Münz isch im 1850i gschlage worde. Zerscht häts no en zimliche Schtriit im Parlamänt gee, öb mer Gäld nach em französische Sischtem mit eim Franke und hundert Rappe oder doch nöd lieber nach em tüütsche Gulde (1 Gulde = 2 Mark = 60 Chrüzer; 1 ½ Gulde = 1 Taler) söli iifüere. Bis hüt wird s Münz vo de Äidgenössische Münzstett z Bärn prägt. 1865 händ die Länder vo Europa, won es dezimals Gäldsischtem gha händ (verglichbar mit de Schwiiz: 1 Franke = 100 Rappe) en Vertrag abgschlosse, das s Gäld vo säbne Länder i alne Länder gültig segi. Das isch mögli gsi, wil zu säbere Ziit de Wächselkurs vom Gold- und vom Silberpriis abghanget isch und nöd vo de Wirtschaft. I däre Latinische Münzunion sind ussert de Schwiiz au Frankriich, Belgie, Italie und Griecheland gsi. Ali Gold- und Silbermünze sind gägesiitig anerchänt gsi (i de Schwiiz vom Füfzger aa ufwärts). 1927 isch di Latinischi Münzunion ufglöst worde. Ma cha säge, das isch en Vorläufer vom Euro gsi.

Nöötli sind zerscht nume en Art Quittige vo äinzelne Banke gsi, won äim gäge d Note (französisch note = Notiz) wider s Gäld (also d Münze) ggee händ. Wil setig Papiir hantlicher gsi sind, wien Seck voll Gäld, hät mer 1907 d Schwiizer Nationalbank als Zentralbank gründet, won ab 1909 als äinzigi Bank in der Schwiiz no Nöötli truckt. Scho di erschti Serie isch bi Orell Füessli truckt worde. D Nationalbank hät bis vor churzem für jedes Nöötli, won si truckt gha häd, de gliichi Wärt i Gold müesse iilagere, wil s Papiir ebe nume a Stell vom „richtige“ Gäld bruucht worde isch (au wän s Münz scho lang nüme us Gold und Silber isch).

1924 häd me de Schwiizerfranke au z Liechtestei iigfüert, won vorane öschtriichischi Chrone und Heller gha häd. En offizielle Wäärigsvertrag zwüschted de Schwiiz und em Fürschtetum gits aber erscht sit em 19. Juni 1980 („Währungsvertrag zwischen der Schweizerischen Eidgenossenschaft und dem Fürstentum Liechtenstein“, SR 0.951.951.4).

Münze[ändere | Quälltäxt bearbeite]

Hütigi Münze[ändere | Quälltäxt bearbeite]

Bitrag Bild Motiv Metall Durmesser Dicki Masse
5-Räppler
(«Föiferli»)
Fünfrappen.jpg Avers: Chopf vo de Libertas ("Fraihait"); CONFŒDRATIO HELVETICA  
Revers: Wert 5 mit Reblaub
Rand: glatt
92 % Cu, 6 % Al, 2 % Ni 17,15 mm 1,25 mm 1,8 g
10-Räppler
(«Batze», «Zäner», «Zähni»)
Zehnrappen.jpg Avers: Chopf vo de Libertas ("Fraihait"); CONFŒDRATIO HELVETICA
Revers: Wert 10 mit Aichelaub
Rand: glatt
75 % Cu, 25 % Ni 19,15 mm 1,45 mm 3 g
20-Räppler
(«Zwänzger», «Zwänzgi»)
Zwanzigrappen.jpg Avers: Chopf vo de Libertas ("Fraihait"); CONFŒDRATIO HELVETICA
Revers: Wert 20 mit Alperööslilaub
Rand: glatt
75 % Cu, 25 % Ni 21,05 mm 1,65 mm 4 g
½ Franke
(«Füfzgerli», «Füfzgi»)
Fünfzigrappen.jpg Avers: d Helvetia; 23 Sternli
Revers: Wert ½ Fr.; Chranz us Aiche (li.) und Alperöösli (re.)
Rand: gripplet
75 % Cu, 25 % Ni 18,20 mm 1,25 mm 2,2 g
1-Fränkler
(vulgo: "1 Stutz")
Einfranken.jpg Avers: d Helvetia; 23 Sternli
Revers: Wert 1 Fr.; Chranz us Aiche (li.) und Alperöösli (re.)
Rand: gripplet
75 % Cu, 25 % Ni 23,20 mm 1,55 mm 4,4 g
2-Fränkler
(vulgo: "2 Stutz")
Zweifranken.jpg Avers: d Helvetia; 23 Sternli
Revers: Wert 2 Fr.; Chranz us Aiche (li.) und Alperöösli (re.)
Rand: gripplet
75 % Cu, 25 % Ni 27,40 mm 2,15 mm 8,8 g
5-Liber
("e Foifliber"; vulgo: "e Schnägg")
Fünffranken.jpg Avers: Büste vomene Hirtebueb; CONFOEDERATIO HELVETICA
Revers: Wert 5 FR.; Edelwiis (li.) und Alperöösli (re.)
Rand: DOMUNVS PROVIDEBIT, 13 Sternli
75 % Cu, 25 % Ni 31,45 mm 2,35 mm 13,2 g

S Wort Föfliber chunt vom französische livre "Pfund". Die 23 Sternli stönd för di 23 Kantöö, di 13 Sternli hend kai tüfferi Bidüttig.

Einzigartigi Münze[ändere | Quälltäxt bearbeite]

Ehemaligi Münze, wo scho vor lengerer Zit abgschafft worde si, und nüme als Zaligsmittel akzeptiert bzw. iigsetzt werde:

  • 1-Räppler (gültig bis Ändi 2006, het aber scho lang kei Bedütig me gha im tägliche Zahligsverchehr)
  • 2-Räppler
  • 10-, 20- und 100-Fränkler in Gold (die het mer au Goldvreneli gheiße.) Si sin siter 1937 nimmi as Zahligsmittel im Gebruuch, wel ihre Goldwärt bi Witem höcher isch aus ihre Nännwärt. Nota bene: nüme im Gebruuch, aber no immer gültigi Zahligsmittel!

Mi het sech im Johr 2006 ou mou überleit, dr Föifer abzschaffe, wüu d Produktion 6 Rp. choschtet het, abr s Echo us der Bevöukerig isch so gross gsi, dass me s het lo si.

Note[ändere | Quälltäxt bearbeite]

Hütigi Note[ändere | Quälltäxt bearbeite]

Vordersiite von ere 50 Franke-Note

Ehemaligi Note[ändere | Quälltäxt bearbeite]

  • 5er-Note
  • 500er-Note

Lueg au[ändere | Quälltäxt bearbeite]

Redensarte mit Rappe/Franke

Weblink[ändere | Quälltäxt bearbeite]

 Allmänd (Commons): Swiss franc – Album mit witere Multimediadateie