Schwäbisches Handwörterbuch
| Dialäkt: Schwäbisch |
S Schwäbische Handwerdrbuach isch a wenzig kloina Zammafassong vom riisiga siibabendiga Schwäbischa Werdrbuach, wo vom Hermann Fischer ond vom Wilhelm Pfleiderer em Johr 1936 abgschlossa worra ischt. E dera handlicha Fassong kôô sich’s (fascht) jedr leischda, wo sich a bissle näher mit-em schwäbischa Dialekt befassa will.
De erscht Uflag ischt 1986 rauskomma mit 434 Seida, de zwoit Uflag fenf Johr schbätr mit kloinore Vorbessronga ond de dridd – erweidret uf 688 Seida – em Johr 1999.
[ändere] Enhalt
Noch de Hinweis zor Benutzong (Ufbau vo ma Wort-Artikl, fonedischs Alphabet, Begriff ond Abkirzonga, geografische Bezoichnonga) folget dia zwoi Hauptdoil Schwäbisch – Deitsch ond, des ischt nui en dr dridda Uflag, Deitsch – Schwäbisch. Ufgnomma worra send do drbei Werdr, wo als Wort ond als Bedeidong bloß em Dialekt vorkommet ond Werdr, wo sowohl em Dialekt wia au em Hochdeitscha vorkommet, em Dialekt abr a andra Bedeidong odr Vorwendong hend wia em Hochdeitscha. Des drifft zom Beischbiil uf da Fuaß zua, wo e dr Bedeidong vom Schwäbischa bis zom Rompf goht; oder ufs Wort schmegga, wo em Schwäbischa neaba schmecken au noh riechen bedeidet. Zwar kennt mr des Wort au guad schwäbisch mit riacha schwätza, abr alde Schwoba nemmet des Wort et en ihr Maul. Fir d Ausschbrôôch isch Teuthonischda-Lautschrift gwehlt worra.
Ganz henda em Buach – uf dr ledschda Seit ond em ennra Doil vom Eibanddeggl – kommt noh a Landkart, wo dia 22 Ondr-Arda vom schwäbischa Dialekt – mitgrechnet isch dô drbei dr schwäbisch-fränkisch Ibrgangsbereich – nôch oinzlne Regiona mit de Städt, vo deane se da Nôma hend (z. B. Esslenger Room) ond ihre Grenza zo de net-schwäbische Nochbrdialekt eizoichnet send.
[ändere] Litradur
Hermann Fischer und Hermann Taigel: Schwäbisches Handwörterbuch, 3. Uflag 1999 mit ma deitsch-schwäbischa Regischtr, Verlag Mohr Siebeck Diibenga, ISBN 3-16-147063-9
