Schnitzelbank
| Dialäkt: Baseldytsch |
E Schnitzelbangg isch e Zsämmestellig vo kurze Värs, wo rhythmisch deklamiert oder gsunge wärde und d Zueherer mit humorvolle Schildrige vo aktuelle oder allgemein menschlige Vorkommnis selle z Lache mache.
Bsundrigs schwyrig und reizvoll isch s fyr e Thema nume sehr wenig Werter z bruuche, und am Ändi vom Värs sett e Pointe sy: je weniger Ziile me bruucht, je kyrzer d Ziile sy und je lustiger und unerwarteter d Pointe isch, umso gresser isch d Kunst vom Schnitzelbänggler. Schnitzelbängg wärde fyr Hochzyte und anderi Fest, d Fasnacht usw. verfasst und vo Einzelpersone oder glaine Gruppe vordrait. Me ka sech uf eme Musiginstrumänt drby begleite, und die meiste Schitzelbänggler zeige Helge, wo zu de einzelne Värs ghere, e grafischi Behandlig vom Thema, wo aber d Pointe nit verrootet.
D Schnitzelbängg stehn in dr Dradition vom Bänggelgsang. Si sy e wichdige Deil vo dr Basler Fasnacht. Aber au an anderen Ert in der Schwiiz und in Sydwestdytschland kennt mä se und drait se im Rahme vo dr schwäbisch-alemannische Fastnacht vor, hüfig in dr Mundart.
S grammatikalische Gschlächt vom Schnitzelbangg [ändere]
Z Basel und dr Umgäbig bruucht mä die männligi Form und sait dr Schnitzelbangg, wenn mä vo de fasnächtlige Schnitzelbängg redet; by anderne "Bängg" bruucht mä die wybligi Form.
| Dä Artikel basiert uff ere fräie Übbersetzig vum Artikel „Schnitzelbank“ vu de dütsche Wikipedia.
E Liste vu de Autore un Versione isch do z finde. |
