D Schlacht uf dr Planta

Schlacht uf dr Planta
Deil vo: Burgunderchrieg
Sion, Ort vo dr Schlacht, um 1900
Datum 13. November 1475 Ort La Planta, bi Sitte Usgang Eidgenössische Siig
Konfliktparteie
Herzogin Yolanda vo Savoye	Eidgenosseschaft, Wallis
Befählshaber
?	Hans am Hengart, Hans Asperlin
Truppesterki
öbbe 10'000 Maa, drvo 1'500 beritteni Adligi	6'000 bis 7'000 Maa, drvo 3'000 - 4'000 Walliser, und 3'000 Eidgenosse us Bärn, Freiburg und Solodurn
Verlust
öbbe 1'000 Doti, drvo 300 Adligi	Unbekannt

Schlachte in de Burgunderchrieg (1474 – 1477)
Neuss – Héricourt – Planta – Grandson – Murte – Nancy

D Schlacht uf dr Planta isch e militärischi Usenandersetzig gsi zwüschen em Herzogtum Savoye und de Eidgenosse und Oberwalliser währed de Burgunderchrieg (1474–1477). Si het am 13. Novämber 1475 stattgfunde.

D Schlacht

Am Morge vom 13. Novämber isch d Hauptmacht vo de Savoyer über e Gränzfluss Morge iidrunge und het noch eme churze Gfächt d Vorhuet vo de Walliser in d Flucht gschlage. E chliineri Druppe vo Savoyer isch über die linggi Flanke uf Savièse vordrunge, het d Verdeidiger gschlage und d Dörfer blünderet und abebrennt. D Hauptarmee isch gege d Stadt Sitte (Sion) marschiert und in die westlige Deil vo dr Stadt iidrunge. Dr Landsturm vo de Zende, wo denn achoo isch, het d Savoyer wider us dr Stadt verdriibe.

Die savoyische Druppe hai sich vor dr Stadt im Ort La Planta neu formiert. D Walliser si schlächt usgrüstet gsi und dr Landsturm het sich scho afo uflöse, wo öbbe 3'000 Freiwilligi us Bärn, Freiburg und Solodurn under Bärner Füehrig über e Sanetschpass in Richdig Savièse vordrunge si und die linggi Flanke vo de Savoyer bedroht hai.

D Bärner hai vo de Walliser, wo dra gsi si sich zruggzzieh, verlangt wiiter z kämpfe und wär gflüchtet isch hai si umbrocht.

Zum ihri linggi Flanke z schütze hai sich d Savoyer e chli gege Weste zruggzoge, d Eidgenosse und d Walliser hai sofort frontal aagriffe. Dr Kampf isch erbitteret gsi bis d Savoyer panikartig die Flucht ergriffe hai und ihre ganz Dross zrugggloh hai. Sächs Wäge mit Harnisch, Waffe und Rüstige und e baar Banner und 120 Stritross hai d Walliser erbütet. D Verlust vo de Savoyer si schwer gsi, meh as 1'000 Doti, drunder 300 Adligi und mehreri Gfangeni. D Verlust vo de Verbündete si nid bekannt, es schiint aber si siige verheltnismässig chlii gsi. D Walliser und d Bärner hai die Flüchtende verfolgt bis es dunkel worden isch und si so uf Conthey cho und hai das grad bsetzt.

Folge

D Walliser hai s ganze Underwallis bis Sankt Moritz und dr strategisch wichdig Gross St. Bärnhardbass bsetzt. Dr Bischof vo Sitte, dr Walter Supersaxo, het sich gweigeret, die eroberete Gebiet an Savoye zruggzgee und 1477 si si as Underdanegebiet Deil vom Wallis worde.

Litratur

• Walliser Geschichte Band 1–3, Arthur Fibicher.

Dä Artikel basiert uff ere fräie Übersetzig vu dere Version vum Artikel „Schlacht_auf_der_Planta“ vu de dütsche Wikipedia. E Liste vu de Autore un Versione isch do z finde.