Scheitelbein

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr menschlig Schädel vo dr Siite us gseh:
1. Stirnbei (Os frontale) (gelb)
2. Scheitelbei (Os parietale)
3. Nasebei (Os nasale)
4. Dränebei (Os lacrimale)
5. Siibbei (Os ethmoidale)
6. Keilbei (Os sphenoidale)
7. Hinderchopfbei (Os occipitale)
8. Schlööfebei (Os temporale)
9. Jochbei (Os zygomaticum)
10. Oberchiifer (Maxilla)
11. Underchiifer (Mandibula)
Dr Schädel vom ene Schoof
Os parietale isch farbig markiert

S baarige Scheitelbei (lat. Os parietale) isch e Deil vom Hirnschädel. Es bildet s Schädeldach und d Siitewand vo dr chnochige Hirnkapsle. Bi de Däuer wird, wil s Stirnbei sehr grooss isch, nume dr Siitedeil vom Schädeldach vom Scheitelbei bildet.

Bim Mensch wird s Scheitelbei von e baar Schädelnööht begränzt: Sutura sagittalis (zwüschen em linke und em rächte Scheitelbei), Sutura coronalis (vorne, zum Stirnbei) und Sutura lamboidea (hinde, zum Hinderchopfbei). Bi Neugeborene het s Fontanelle zwüschen em Scheitelbei uf dr einte Siite und em Stirn- (Fonticulus major), Keil- (Fonticulus sphenoidalis), Hinderchopfbei (Fonticulus minor) und em Schlööfe- und Hinderchopfbei (Fonticulus mastoideus) uf dr andere Siite.

Nach unde isch s Scheitelbei bi alle Süüger mit em Schlööfe- und em Keilbei dur e Chnochennoht verbunde.

An dr Siiteflechi vom Scheitelbei setzt dr Musculus temporalis (Schlööfemuskel) aa, eine vo de Chäumuskle. Die oberi Begränzig vo siim Ursprung bildet e dütligi Linie, d Linea temporalis. Usser bim Mensch und bi Wiiderchäuer vereinige sich d Lineae temporales vo beide Siite zun ere chreftige mediane Chnocheleiste (Crista sagittalis externa) am obere Schädeldach.

Dä Artikel basiert uff ere fräie Übersetzig vu dere Version vum Artikel „Scheitelbein“ vu de dütsche Wikipedia.

E Liste vu de Autore un Versione isch do z finde.