Säuliamt

Us der alemannische Wikipedia, der freie Dialäkt-Enzyklopedy
(Witergleitet vun Säuliamt)
Bezirk Affoltere (Säuliamt/Chnoonaueramt)
S Wappe vom Säuliamt
S Wappe vom Säuliamt
Basisdate
Kanton: Züri
Verwaltigssitz: Affoltere
Flächi: 113.01 km²

S Säuliamt oder au s Chnoonauer Amt isch än Bezirk i de Schwiiz und liit im Südweschtzipfel vom Kanton Züri. De offiziell Name luuted hützdogs Bezirk Affoltern.

Es umfasst s Gebiet zwüsched em Freiamt und em Chalberamt/Bezirk Horge, vom Albis-Chamm bis zur Rüüss bi Ottebach.

Es git zwai Wersione, wie s Säuliamt zu däm Namä cho isch: Bi dä altä Hüüser im Amt gseht mär under de Schtäge mängisch än chliinä Ruum. Det hät früenär d Sau gschlafe. Am Tag hät si frei chöne umälaufe. Das isch tüpisch gsii fürs Säuliamt. Dänn gits no ä Legände, dass ä mal än Puur heg müesse äm Fraumünschterschtift sin Zähnte abliefere. Er heig uf äm Albis-Chamm obe ä Sau und äs Chalb Richtig Züri tribe. Do plötzlich seiged äm diä beide dävo gschprunge. S Chalb nach rächts is Sihlthal und d Sau nach links gäge s Rüüsstal. Und sid do heissts det Chalberamt und Säuliamt.

1507 hät de Stadtzürcher Rat beschlosse, sini Bsitztümer weschtlich vo de Albis-Chetti als Landvogtei vom Schlössli in Chnoonau us z verwalte. Vo do ä wäg hät s Säuliamt au Chnoonauer Amt gheisse.

I de Helvetik vo 1798 isch s Chnoonauer Amt für churzi Zyt zum helvetische Bezirk Mäpmischtette worde. Bis es dänn 1837 mid de Verlegig vo de Bezirksverwaltig vo Chnoonau nach Affolterä zum Bezirk Affolterä worde isch. Denäbed wird aber inoffiziell de Name Säuliamt wyter bruucht. Er läbt au im Säuliämtlerliäd wyter, wo s öppe haisst: Diä schwerschte Säu händ mir ellei, dezue es prächtigs Veh und s'beschti Moscht im ganze Land, das händ nur mir, persee. Es git ken Fläck uf de Wält, so schön wiä s Säuliamt...[1]

1804 sind öppe 150 Mänsche usem Säuliamt uf d Krim uusgwanderet und händ s Dorf Zürichtal ggründet.

Politische Gmeinde[ändere | Quälltäxt bearbeite]

Wappe Gmeindsnäme PLZ Iinwoner
(31. Dezember 2021)
Flächi
in km²
Aeugst am Albis Öigscht 8914 1988 7.87
Affoltern am Albis Affoltere am Albis 8910 12'404 10.56
Bonstetten Bauschtette 8906 5632 7.42
Hausen am Albis Huuse am Albis 8915 3852 13.64
Hedingen Hedige 8908 3780 6.59
Kappel am Albis Kappel am Albis 8926 1290 7.87
Knonau Chnoonau 8934 2445 6.48
Maschwanden Maschwande 8933 641 4.67
Mettmenstetten Mäpmischtette 8932 5570 13.11
Obfelden Obfälde 8912 5760 7.54
Ottenbach Ottebach 8913 2745 4.98
Rifferswil Rifferschwil 8911 1150 6.50
Stallikon Schtalike 8143 3825 12.01
Wettswil-am-Albis Wettschwil am Albis 8907 5288 3.77
Total (14) 56'370 113.01

Externi Syte[ändere | Quälltäxt bearbeite]

Einzelnachwys[ändere | Quälltäxt bearbeite]

  1. Squix.org: Säuliämtlerlied und Ämtlermarsch


Dä Artikel basiert uff ere fräie Übersetzig vum Artikel „Affoltern_(Bezirk)“ vu de dütsche Wikipedia. E Liste vu de Autore un Versione isch do z finde.