Rudra

Us der alemannische Wikipedia, der freie Dialäkt-Enzyklopedy
Hops zue: Navigation, Suech

De Rudra (skt. रुद्र Rudra m. »Hüüler«) isch im Vedismus de gförchteti Gott vo de Wildnis gsii und de Vorgänger vom Hindugott Shiva.

Im Rigveda sind em Rudra nume grad drai Hymne gwidmet. Sini Frau isch d Prishni und er isch de Vatter vo de chriegierische Sturmgötter Maruts. Sini Chraft und Wuet sind zerstörerisch und er werd de stärchst vo allne Starche gnennt. Sini Waffe isch de Pfiilboge und er isch de gförchteti Rächer. Er isch de Gott vo de Wildnis, de wilde Tier und au vo de Jagd, wo as Opfer Wildfrücht und Reemilch öberchunnt. Aber de Rudra isch au de Hailgott, jo de Arzt vo allne Ärzt, und chennt tuusigi vo Hailmittel.

De Rudra werd nöd nume vo sinene Söö, de Maruts, biglaitet, sondern au vonere Gruppe, wo Rudras gnennt werd. Eri Aazaal werd i de Regle mit elf aaggee.

Büecher[ändere | Quälltäxt bearbeite]

  • Hans Wilhelm Haussig (Hg.): Götter und Mythen des Indischen Subkontinents. Stuttgart: Klett-Cotta (1984). ISBN 3-12-909850-X