Rudolf von Zähringen

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Rudolf uf ere Bildplatte vum Franz Xaver Hauser (1738–1819) im Fryybeger Minschter

Dr Rudolf vu Zährige (* ca. 1135; † 5. Augschte 1191 z Härdere bi Fryybeg) isch Erzbischof vu Mainz un Bischof vu Lüttich gsi.

Dr Rudolf isch e Suhn gsi vum Herzog Konrad I. vu Zährige un dr Clementia vu Luxemburg-Namur. Är isch anne 1160 dur d Mainzer Burger zum Noofolger vum Arnold vu Selenhofen beruefe, vum Chaiser Friedrich I. aber nit anerchännt wore. D Ursach doderfir sin greßeri Spannige zwische dr Staufer un dr Zähriger gsi. Uf em em Konzil vu Lodi isch dr Rudolf exkommuniziert wore, derno het dr Christian I. vu Buch d Noofolg vun em z Mainz aadrätte. Wu sich s Verhältnis vu dr beide Herrschaftshyyser entspannt gha het, isch dr Rudolf anne 1167 schließli Bischof vu Lüttich wore, doderbyy isch er vu syym Brueder, em Herzog Berthold IV. vu Zährige unterstitzt wore. In syyre Amtszyt isch e Schädelreliquie vum Lambert vu Lüttich uf Fryybeg chuu, wu hite zum Fryybeger Minschterschatz ghert.[1]

Am 11. Mai 1188 isch dr Rudolf mit syym Heer z Regensburg zum Dritte Chryzzug unter em Friedrich Barbarossa ufbroche. Im Oktober 1190 isch er bis zue dr belagerete Stadt Akkon chuu. Uf em Ruckwäg vum Chryzzug isch er anne 1191 uf syym Eigeguet z Härdere gstorbe un isch im Chloschter St. Peter begrabe wore.

Literatur[ändere | Quälltäxt bearbeite]

  • Alexander Cartellieri: Rudolf (Bischof von Lüttich). In: Allgemeine Deutsche Biographie (ADB). Band 53, Duncker & Humblot, Leipzig 1907, S. 584 f.
  • Thomas Zotz: Rudolf. In: Neue Deutsche Biographie (NDB). Band 22. Duncker & Humblot, Berlin 2005, S. 176 f.

Weblink[ändere | Quälltäxt bearbeite]

Fueßnote[ändere | Quälltäxt bearbeite]

  1. Karl Schmid; Hans Schadek; Jan Gerchow: Veröffentlichungen zur Zähringer-Ausstellung. 2. Anstoss und Wirkung die Zähringer, J. Thorbecke, Sigmaringen 1986, ISBN 3799570411, S. 217 f.
Vorgänger Amt Nochfolger
Arnold vu Selenhofen Erzbischof vu Mainz
1160
Christian I. vu Buch
Alexander II. vu Orle Bischof vu Lüttich
1167-1191
Albrecht I. vu Löwen