Romäus
De Romäus (Romeias) hät mit bürgerlichem Name Remiguis Mans ghoaße. Wenn er gebore worre isch woaß mer net. Gschtorbe isch er 1513 i de Schlacht bi Novara.
De Romäus isch de Villinger Lokalheld. Liit hän vuzellt, dass er riisegroß un mords stark gsii isch. So en Kerle hät sich natülich gern mit de Obrigkeit aaglegt.
Vu ihm giits en huufe Gschichte un Legende:
Wo Villinge mal mit Rottwiil in Fehde glege isch hät de Romäus ebbs ganz bsunderes mache welle. Also isch er ganz äloa noch Rottwiil in d'Stadt niigange. D'Rottwiiler hän s'Stadttor zuegmacht um ihn z'fange. De Romäus hät aber die Torwach umghaue, en Fligel vum Schtadttor uusghängt un hät sine Beute uf m'Buckel noch Villinge trage un am Obere Tor abgschtellt.
In em Streit hät er mal arg wüescht gege de Schultheiß gschwätzt. Wege sellem hät ihn d'Obrigkeit vu de Stadt i de St. Michaels-Turm glockt un hät ihn dert lebenslänglich iischperre welle. Da drinne wär de Romäus wahrschiints vuhungeret aber sine Freund hän ihn mit ällem meegliche vusorgt. So hät er au manchmal broatene Käber krigt. Selle Knoche hät er ufghebt un sich so e Stige baut wo ner dann hät aubhaue kenne. Die Spure vu sinem Uusbruch giits hit no im Romäusturm!
Die Stadtobere hän noch sinem Tod en Abbild vu ihm ufd Stadtmuur bim Obere Tor mole losse. Wie dann die äußer Stadtmuur 1840 abgrisse worre isch, isch au des Romäusbild vuschwunde. Sell Bild isch aber für d'Villinger Burger so arg wichtig gsi, dass e neus Romäusbild uf de St. Michaels-Turm gmalt worre isch. Der Turm hoaßt jetzt bi de Liit Romäus-Turm.
Viliicht sin im Romäus mehrere hischtorische Gschalte vueinigt. Sicher isch, dass er glebt hät, denn sin Name duucht efters i de Villinger Stadtchronik uf.
Weblink[ändere | Quälltäxt bearbeite]
- [1] (Site cha nüme abgrüeft wärde; Suche im Webarchiv)