RhB Ge 6/6 II

Us der alemannische Wikipedia, der freie Dialäkt-Enzyklopedy
Ge 6/6 II
Nummerierig: 701-707
Azahl: 7
Hersteller: SLM, MFO, BBC
Baujohr: 1958,1965
Achsformel: Bo'Bo'Bo'
Spurwiiti: 1000 mm
Längi über Puffer: 14 500 mm
Breiti: 2650 mm
Dreihzapfenabstand: 8600 mm
Dreihgstellachsstand: 2500 mm
Gsamtradstand: 11100 mm
Dienstmasse: 65 t
Riibigsmasse: 65 t
Höchstgschwindigkeit: 80 km/h
Stundeleistig: 1776 KW
Afahrzugkraft: 214 kN
Triibraddurchmässer: 1070 mm
Stromsystem: 11 kV 16,7 Hz
Stromüberdrägig: 2 Stromabnehmer
Zahl vo de Fahrmotor: 6


D' Ge 6/6 II isch ä sächsachsigi Loggi bi d'r Rhätische Bahn. De Buechstabe „G“ isch stellverträtend für schmalspurigi Triebfahrzüg. Zur Bezäichnig gchört ä römisches „2“, will schu ä-n-erschti Ge 6/6 gmacht wordä-n-ischt - das isch ä Krokodilloggi vu d'r gliiche Bahngsellschaft und hüt nüm im Regeldiänscht.

Im Achtefüfzgi händ d' Elektrizitätswärch vu d'r Stadt Züri aagfange, d' Chraftwärch im Bergell z' buue. Im Bergell sälber git's kei Ysebahnlinie, doch di Rhätisch Bahn het jedä Tag müese um di tuusig Tonnä Zemänt bis uf Sankt Moritz transportiärä. Das hät mer äläi mit d'r RhB Ge 4/4 I und d'r Krokodilloggi nüm chänne bewältige, also hät's ä nüüi, starchi Loggi bruucht. Di Schwiizerisch Loggi- und Maschinefabrigg (SLM) in Winterthur, d' Brown, Boveri & Cie (BBC) z' Badä und d' Maschinefabrigg Örlike (MFO) hend d'r Zueschlag überchuu, sibä Stugg vu derä nüüä Buukonschtrukzuii z' buue. Zum Stiigige und Gfell besser chänne bewältige, hend's i d'r Mitti äs Glänk überchuu wu mer nur vertikal cha bewegä. I d'r Folg hend di gliiche Hersteller au di erschte zwäi Prototype vu d'r Buuräihe SBB Re 6/6 mit so Glänk uusgschtattet. Di letschti Ge 6/6 II isch im Füfesächzgi in Diänscht gschtellt wordä.

Wu d' Chraftwärch fertig buut gsii sind, het mer d' Ge 6/6 II vor Allem im Schnällzugsdiänscht uf d'r Albulaliniä iigsetzt. Im Driienünzgi sind si deet vu de RhB Ge 4/4 III abglööst wordä. Sithär wärdet's wider vor Allem im Güeterverchehr iigsetzt, aber au vor Schnällzüg zwüsche Schuls und Disentis.