Reisläufer

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Eidgenössischi Reisläufer bim Zug über d Alpe (Luzerner Schilling)
Niklaus Manuel d. J. in dr Dracht vom ene eidgenössische Reisläufer, 1553

As Reisläufer si d Schwiizer Söldner bezeichnet worde, wo bis ins 17. Johrhundert im Dienst vo zahlriiche europäische Herrscher gstande si. S mittelhochdütsche Reis bedütet do Ufbruch oder Reis, in däm Zsämmehang d Chriegs-Reis, dr Chriegszug.

Die grossi Ziit vo de Reisläufer si d Chrieg um s Herzogtum Mailand um 1500 gsi. D Schlachte z Italie zehle zu de bluetigste, wo sich Söldnerarmeä je gliiferet hai.

Bis 1929 hai Schwiizer Bürger döfe in fremde Armeä diene. Sit denn si Söldner vor Gricht gstellt worde, wenn si in d Schwiiz zruggcho si. Die einzigi Usnahm isch dr Dienst in dr Päpstlige Schwiizergarde, wo au hüt no nume us Schwiizer Katholike bestoht. Mit vile Staate het d Schwiiz hützudag Abkomme über dr Milidärdienst vo Schwiizer und Doppelbürger. Dr Dienst in dr französische Fremdelegion isch aber bis hüt immer no stroofbar.