Dr Regishäimerhoof

Us der alemannische Wikipedia, der freie Dialäkt-Enzyklopedy

Koordinate: 47° 33′ 20,5″ N, 7° 35′ 30,5″ O; CH1903: 611530 / 267232

Dr Regishäimerhoof in dr Middi vom Bild, dr Falkestäinerhoof isch grad rächts nääbedraa
Dialäkt: Baaseldütsch
Uschnitt us dr Stadtaasicht vom Matthäus Merian im 17. Joorhundert[1]
Wisawii vom Münster chunnt dr Münsterbärg in Münsterblatz iine. Dr Regishäimerhoof und dr Falkestäinerhoof stöön grad am Blatz uf dr lingge site vom Münsterbärg (vom Münster us gsee).

Dr Regishäimerhoof isch e historischs Bauwärk am Münsterblatz 10 in dr Altstadt vo Baasel. Er gältet as äins vo de Baasler Kulturgüeter, wo für d Region vo Bedütig si. Dr Regishäimerhoof ghört hüte zämme mit em Falkestäinerhoof am Münsterblatz 11 nääbedraa und em Domhoof (Münsterblatz 12) zum Baudepartemänt vo Baasel.

Baugschicht[ändere | Quälltäxt bearbeite]

Im Spootmiddelalter häi im Regishäimerhoof Doomhere gläbt. Wo 1529 Baasel reformiert worde isch, si die katholische Doomhere us iire Hüüser am Münsterblatz uszooge und uf Freiburg im Brisgau züüglet.

Im 16. Joorhundert het dr Ambrosius Froben im «Neuwen Hoff Regesheim» gwoont und 1561 het s dr Rootsher Remigius Faesch (1541–1610) nöi usgrüstet. Spööter si stedtischi Magistrate dri khoo.[2]

1767 het dr Johann Jacob Fechter am gotische Regishäimerhoof afo schaffe und iim si barocki Fassade gee. Das isch Däil vo dr Modärnisierig vom Münsterblatz im 18. Joorhundert gsi, wo mit em Umbau vom Falkestäinerhoof 1779 abgschlosse gsi isch.

Im 19. Joorhundert isch dr Regishäimerhoof s Domizil vom Johann Jakob Meriaa gsi. Wo aber si Frau Elisabeth 1815 gstorbe isch, het dr Meriaa zwäi Joor druf d Henriette Wieland ghürootet und d Familie isch in dr Andlauerhoof am Münsterblatz 17 züüglet.[3]

Vo 1903 bis 1906 isch dr Geböidkomplex am Münsterblatz 10-12 vom Baasler Hochbauinspäkter Theodor Hünerwadel umbaut worde für zum kantonali Verwaltigsorgan driizdue.[4]

Hüte isch in de drei Geböid Münsterblatz 10 bis 12 s Baasler Baudepartemänt dehäi. Im Raame vo de Aasträngige vo dr Regierig, d Innestadt z belääbe, überläit mä sich, öb mä s Amt nid chönnt verleege und d Geböid as Hotel, Woonhüüser oder äänligs chönnt bruuche.

Fuessnoote[ändere | Quälltäxt bearbeite]

  1. Die ganz Aasicht vo dr Stadt Baasel vom Merian vo 1642.
  2. Anne Nagel, Martin Möhle, Brigitte Meles: Die Kunstdenkmäler des Kantons Basel-Stadt, Birkhäuser, 2006, S. 51
  3. riehenstrasse (Memento vom 29. März 2017 im Internet Archive), abgrüeft am 12. Dezämber 2014
  4. «Europäischer Tag des Denkmals 2011», usegee vo dr Kantonale Dänggmolpflääg Baasel-Stadt. Biilaag zur Basler Zeitung vom 3. Septämber 2011