Regio-Verkehrsverbund Freiburg
| Dialäkt: Markgräflerisch (Ebringe) |
Dr Regio-Verchehrsverbund Friburg (RVF) isch e Verchehrsverbund, wo im Uftrag vum Zweckverband Regio-Nohverchehr Friburg (ZRF) uf em Gebit vu dr chreisfrie Stadt Friburg im Brisgau sowie dr Landchreise Brisgau-Hochschwarzwald un Emmedinge dr ÖPNV betribt. Dr ZRF wird vu dene drei Chreise trage.
Gschichte vum RVF[ändere | Quälltäxt bearbeite]
D Regio-Verchehrsverbund Friburg GmbH isch am 1. Jänner 1994 gründet worre, um im Verbundgebit iber e eiheitlichs Verbundtarifsystem fer e besseri Nutzig vu Busse un Bahne zsorge. Chernstuck vum Tarif isch debi d Munätscharte, wo verbundwitt giltet un trotz einige Traiferhöhige gegenyberem Auto uschlagbar günstig isch. Degege sin d Einzelfahrschin verhältnismässig dyr un dr Fahrpris isch fer Churzstrecke iber Tarifzonegrenze nüber eher prohibitiv. Positiv formuliert: Dr Stammchunde isch absoluter Chenig im RVF.
Ursprünglich isch dr RVF e Gsellschaft bestehend us Gebiitskörperschafte un Verchehrsundernähme gsi, mit folgende Gsellschafter:
- Land Bade-Württeberg mit 10 %
- Zweckverband Regio-Nohverchehr Friburg (ZRF) mit 40 %
- 17 Verchehrsundernähme mit insgsamt 50 %
Später isch e Trennig zwische Besteller (Gebiitskörperschafte) un Verbund erfolgt, au ufgrund vu dr Erfordernisse vum EU-Recht.
S Land Bade-Württeberg het sich als Gsellschafter zruckzoge, un dr ZRF het als Älleigsellschafter d'Regio-Verbund GmbH (RVG) gründet, wo bim RVF dr Verchehr bstellt un mit em Verbund e Grundlage- un Zueschussvertrag abgschlosse het.
Hütigi Gsellschafter vum RVF sin:
- Brisgau-S-Bahn GmbH mit 4 % (Dochter vu VAG un SWEG mit je 50 % Adeil)
- Dütschi Bahn (DB) mit 45 % über zwei 100%ige Dochtergsellschafte (im 100%ige Bundesbesitz)
- Freiburger Verkehrs AG (VAG) mit 33 % (im 100%ige Besitz vu dr Stadt Friburg)
- Südwestdütsche Verchehrs-Aktiegsellschaft mit 8 % (im 100%ige Besitz vum Land Bade-Württeberg)
- sowie 12 lokali, privati Busundernähme mit insgsamt 10 %
Die Dütsch Bahn AG isch über d DB Regio AG mit 25 % un über d Südbadebus (SBG) mit 20 % am RVF beteiligt.
Weblink[ändere | Quälltäxt bearbeite]
- Uftritt vum Regio-Verkehrsverbund Freiburg Gesellschaft mbH (RVF)
- Zweckverband Regio-Nohverchehr Friburg (ZRF)
- Friburger Verkehrs AG (VAG)
- SBG SüdbadenBus GmbH / Regio Bus Baden-Württemberg