Reformierte Kirche Auenstein

Di reformirt Chile vo Gauestei

Di reformiirt Chile vo Gauestei isch di reformiirt Dorfchile von de aargauische Gmeind Gauestei in de Schwiiz. Im Johr 1302 isch si zum erschte Mol in ere Urkund erwähnt worde.

[ändere] Gschicht

De hütig Chilebau isch in gotischem und spotgotischem Stil und uf de Fundament von ere romanische Chile bauet worde. Si isch nach de erschte Erwähnig vom 1302 immer wider veränderet worde, so zum Bischpil im 15. Johrhundert durch de aabaute Chorruum oder in de Mitti vom 17. Johrhundert, wo me s Chilleschiff erwiteret het. Immer wider isch d Chile renoviirt worde. Dokumentiirt sind Renovatione in de Johr 1572/73, 1893 (usse), 1943 (usse), 1951/52 (inne), 1966 (usse) und 2004 (inne) und im 1984 het d Chilegmeind de Chileturm laa saniire.

[ändere] Usstattig

Im Chor vo de Chile het's Wappeschiibe, wo in de Ziit um 1500 hergschtellt worde sind. Di Schibe ghöre im Kanton Aargau. D Wappeschiibe, wo im Schiff vo de Chile sind, sind dütlich jünger. Zwei sind us de Ziit vo de Erwiterig vo de Chile ums Johr 1652 und eine us em 1952. Letschteri het de Aargauer Künstler Felix Hoffmann gschaffe. Alli drü Schibe ghöre de Chilegmeind. Sit em August 1966 hanged viir in f, a, c´´ und d´´ gschtimmti Glocke im Turm. D Orgel, wo vo de Firma Metzler Orgelbau errichtet worde-n-isch, isch us em Johr 2008.