Reduit

Dialäkt: Züridütsch (See)

S Reduit z Mainz-Kastel vom Rhii us gsee

S Réduit isch en verschtärchte Verteidigungsbau, wo zum Rückzug für d Besatzig dient hät, falls dr vorglagereti Verteidigungswall vom Find überwunde worde isch. S Réduit (s Chernwerch) liit im Innere vomene Verteidigungswall. Vermehrt zum Iisatz sinds bi de detachierte Werch vo dr Neupreussische/Neudüütsche Befeschtigungsmanier vom 19. Jahrhundert choo. Sie ghörted zu de schtärchschte Feschtigsaalage und hätted sölle e hartnäckigi Verteidigung gwährleischte. D Zitadelle zum Biischpiil isch s Reduit beziehigswiis Rückszugswerch innerhalb vonere Feschtig.

S Réduit i de Schwiizer Alpe (Réduit National)

Zu Einzelheite lueg bim Artikel Schwiizer Reduit.

S Reduit vo dr Schwiiz, die durezogeni Linie zeigt s eigentliche Rückzugsgebiet

Während em 2. Weltchrieg isch s Réduit zum Begriff vom Widerschtand vo dr Schwiiz gege s Dritte Riich worde. Zum einen vo ihrem geischtige Widerschtand, zum andere vomene konkrete militärische Widerschtand vo dr Schwiizer Armee i dr Alpefeschtig.

Bunker vo de Limmatstellig im Wasserschloss

Vo dr Grenze durs Mittelland hett im Chriegsfall nur no en Verzögerigskampf sölle gfüehrt werde. S dichtbevölkerete Mittelland und demit alli wirtschaftliche Zentre vom Land wär notfalls priisgeeh worde.

D Zentralruumschtellig hät im wesentliche de Alperuum ohni de grösseri Teil vo Graubünde und wiitgehend au ohni s Tessin umfasst, wobii di nördlichi Grenze im Berner Oberland dur de Hohgant, Heiligenschwendi und de Thunersee, sowie de Underlauf vo dr Chander und d Stockhornchetti bildet worde isch.

Zu de wichtigschte Feschtige vom Réduits händ d Feschtigswerch Sargans und St-Maurice sowie dr Sankt Gotthard als Zentrum vom Réduit ghört.

wiiteri Reduits

• Bundesfeschtig Ulm - mehreri Usseforts
• Feschtig Koblenz - Fort Aschterschtei, Feschti Kaiser Franz
• Feschtig Mainz - Rhyufer bi Mainz

Uuf dr hessische Rhysiite (Mainz-Kastel (zu Wiesbade)) direkt nebe dr Theodor-Heuss-Brugg liit s Reduit gnännte Gebäude. Es beherbergt hüt zahlriichi Vereinsheim und Jugendpflege-Iirichtige. Dr Innehof wird im Summer für Open-Air-Kinos, -Konzert und anderi Veraaschtaltige gnutzt. Usserdem isch au s Kaschteler Heimatkundemuseum, s Museum Castelanum, i dr Reduit underbracht.

• Komárno (Slowakei)

Literatur

• Dr zweiti Weltchrieg Band 1 ISBN 3-7166-0048-2
• Walter A. Gieringer (Hrsg.): Erinnerige a d Feschtigsbrigade 13. Bündner Buechvertrieb, Chur 2003
• Bundesarchiv Bern

Weblink

• D Feschtigsmusee vo dr Schwiiz

Dä Artikel basiert uff ere fräie Übbersetzig vum Artikel „Reduit“ vu de dütsche Wikipedia. E Liste vu de Autore un Versione isch do z finde.