Pylos (Messenie)

Us der alemannische Wikipedia, der freie Dialäkt-Enzyklopedy
Charte vom Kap Koryphasion im Norde vo de Bucht vo Navarino
s Paleokastro vo de Bucht Voidokilia us gsie
d Bucht Voidokilia vom Paleokastro us gsie
s „Grab vom Thrasymedes
de Iigang zo de „Nestorhööli“

Pylos (altgriechΠύλος) isch en antike Ort z Messenie gsii und isch nördlich vo e Bucht vo Navarino glege. De Ort litt bim staile Kap Koryphasion (Κορυφάσιον »Nolle«). D Stadt Pylos isch erst noch de Noigründig vom Messenische Staat im 4. Jh.v. Chr gründet wore.

Laag[ändere | Quälltäxt bearbeite]

S Kap Koryphasion litt nördlich vo de Bucht vo Navarino, parallel zu de Chüste. Im Süüde raagts stail usem Meer, im Norde isches echli flächer. Am Nordabhang isch e Hööli. Nördlich do devo isch e chliini rundi Bucht, wo i de Antiki Bouphras, hütt aber Voidokilia ("Chuebuuch") haisst.

Gschicht[ändere | Quälltäxt bearbeite]

I de Hööli ufem Kap Koryphasion hend scho i de Jungstaizitt Mensche glebt. I de Bronzezitt isch d Bucht vo Navarino zomene wichtige Hafe woore und a de Bucht Voidokilia sind denn zwai Chuppelgräber baut wore, e Zaiche, as de Ort strategisch wichtig gsii isch. Noch de Zerstörig vom mykenische Palast z Ano Englianos isch am Südfuees vom Kap Koryphasion e chliine Hafenort entstande.

I de Messenische Chrieg isch s Kap an vo de letschtere Rückzug vo de Messenier gsii, bivoor si vo de Spartaner underjocht oder vertribe woore sind. Drufabe isch s Land veröödet.

Im Summer 425 v. Chr. hett de Athener Demosthenes druf hiigwise, as s Kap Koryphasion wunderbar gaignet sai, för e Festig. I nume sechs Taag hend d Athener s Kap bifestigt. D Spartaner hend drufabe wöle d Athener vertriibe, aber noch 72 Tääg hend s müese uufgee. D Athener hend de Ort Pylos gnennt. Zwai Joor spööter hend d Spartaner und d Atheener e Fride gschlosse und bschlosse, as d Athener ufem Kap bliib tööred, und zwoor ghöri ene s Land am Koryphasion zwöschet de Bucht Bouphras und em Berg Tomeus. De Vertrag isch nocheme Joor gänderet woore, nämli as d Athener abzüchet, was aber nöd gmacht hend. 410 v. Chr. hends d Spartaner aber gschafft, d Athener z verjage und s Kap Koryphasion iznee.

Noch de Gründig vom Messenische Staat ane 369 v. Chr. isch bim Kap Koryphasion di noi Stadt Pylos entstande. Im 2. Jh.n. Chr. het de lydischi Schirftsteller Pausanias Periegetes die Stadt bsuecht und gfunde, as da d Stadt vom sagehafte Nestor sai, wo nochem Homer sind Palast z Pylos gha het. Allerdings hend sich die antike Gleerte gstritte, weles Pylos gmaint sai, dos dozmol drai Pylos ggee het, ais z Messenie, ais z Triphylie und ais z Elis. Di Iihaimische hend em Pausanias i de Stadt s Huus vom Nestor zaiget, wo au e Bild vom König gmoolet gsii isch. Au sis Graab het er gsie, im Norde vo de Stadt hend s em s Graab vom Thrasymedes zaigt, de Soo vom Nestor wo z Troia umchoo isch. Natüürli chönnt die Plätz nöd wörkli a dene unhistorische Helde zuegschribe were.

Im 6. Jh. n. Chr. sind d Aware i d Peloponnes iigfale und hend sich am Kap Koryphasion niderloo. Drum werd d Bucht hütt no Navarino gnennt.


Weblink[ändere | Quälltäxt bearbeite]

 Commons: Pylos (Messenie) – Sammlig vo Multimediadateie

Koordinate: 36° 54′ 30″ N, 21° 42′ 0″ O