Psychedelisch

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Psüchedelisch (vo gr. ψυχη (psychḗ, „Seel“) und gr. δῆλος (dẽlos, „offebar“)) bezäichnet e veränderete Bewusstsiiszuestand, wo dur dr Konsum vo bestimmte Droge (sogenannte Psüchedelika), aber au dur gäistigi und rituelli Braktike (wie öbbe Dransdanz oder Meditazioon) cha erräicht wärde. Dä isch under anderem charakterisiert dur en Ufheebig vo de Gränze zwüschen em Ich und dr Ussewält, wo spirituelli Erlääbniss und Erfaarige vo Alles-isch-äins mööglig mache. In däm Zämmehang reedet mä vilmol au von ere Bewusstsiiserwiterig.

Dr Begriff isch 1956 im Briefwäggsel vom Psüchiater Humphry Osmond mit em Schriftsteller Aldous Huxley brägt worde, wo dr Osmond gschriibe het:

To fathom Hell or soar angelic,
Just take a pinch of psychedelic.[1]

Psüchedelischi Drooge[ändere | Quälltäxt bearbeite]

Verschidnigi psüchtroopi Substanze chönne e sogenannte Trip mit psüchedelische Zueständ uslööse.

Psüchedelischi Kunst[ändere | Quälltäxt bearbeite]

D Stilrichdig vo dr psüchedelische Kunst isch nit genau definiert. Si brobiert Iidrück, wo mä im psüchedelische Zuestand erfaart, darzstelle oder z manifestiere.

Gwüssi Richdige in dr Muusig nämme Bezug uf e psüchedelische Bewusstsiiszuestand. Dodrzue ghööre Psychedelic Rock (Acid Rock), Psychedelic Folk, Psychedelic Trance (Goa) und Stoner Rock. Wil s LSD s Diethylamid vo dr Lysergsüüri isch, brucht im Naame vom ene Hufe Muusigrichdige, wo as psüchedelisch empfunde wärde, s Wort Acid (änglisch für Süüri) z.B. Acid House, Acid Rap, Acid Techno, Acidcore, Acid Trance und Acid Jazz.

Au dr Psytrance (oder GOA) wird as psüchedelischi Muusig bezäichnet. Psytrance bestoot im Grund us 4/4-Takt zwüsche ursprünglig 130 und 150 bpm (beats per minute), wo mä verschidnigi psüchedelischi Komponänte drzueduet. Dark Psy (vo Dark Psytrance, au Killer-Psy oder Horrortrance) isch en Underart vom "normale" Psytrance und bestoot grundsätzlig us schnällere Takt (145 bis 165 bpm), und die häi Komponänte wo "gruuselig" wirke. Die mäiste Psytrancefans finde das subjektiv as z schnäll, und dänke, ass die psüchedelische Aspäkt in dr Hindergrund wurde dräte.

Fuessnoote[ändere | Quälltäxt bearbeite]

  1. Janice Hopkins Tanne: Humphry Osmond.

Weblingg[ändere | Quälltäxt bearbeite]

 Allmänd (Commons): Psychedelisch – Sammlig vo witere Multimediadateie
Dä Artikel basiert uff ere fräie Übersetzig vu dere Version vum Artikel „Psychedelisch“ vu de dütsche Wikipedia.

E Liste vu de Autore un Versione isch do z finde.