Peter Boschung

Dr Peter Boschung (* 29. Dezember 1912 z Schmitte; † 19. Jänner 1999 ds Flamatt) isch a Tütschfrybùrger Tokter gsyy, wo sich für syyni Seislertütschi Muetterspraach yygsetzt ghääbe het. Nach synere Matura im 1935 ds Frybùrg het er ds Frybùrg ù z Bärn Medizin studiert ù im 1942 zum Dr. Med. promoviert. Im 1945i isch er umi ins Frybùrgschi cho ù hat aus Tokter ds Flamatt gschaffet.

Im 1959i het er di Dütschfrybùrger Arbiitsgmiinschaft gründt ù isch bis ins 1973i de Obmann va dere Arbiitsgmiinschaft blübe. Er isch in vüune Beryych aktiv gsyy, wo's drum gange-n-isch s Tütsch im Kanton Frybùrg z stärche, sowou d Mùnnart wie ùù s Schrifttütsch. Sys Züu isch es gsyy Tütsch zu ere glyychwertige ù anerkannte Spraach ds Frybùrg z mache. So het er de Tütschfrybùrger Kulturpryys mit gründt ù s «Theater in Freiburg.». Im 1969i het er an de Spraachecharta vam Frybùrger Inschtitut mitgschaffet, wo Grùnnsätz gsammlet het, wo für es fryydlichs mitenann va verschidnige Spraachgmiinschafte notwendig syy. Im 1989i het ihm d Universität Frybùrg d Ehredoktorwürde verliehe.

Mit ere Petition ù syym jaarelange intensive Yysatz isch es glunge, dass im 1990 en nüüe Spraacheartikel in d Frybùrger Kantonsverfassig cho isch, wo em Tütsch meh Aaerkennig gäh het. D Würkig vam Werch vam Peter Boschung uf's Selbschtbewusstsyy va de Tütschfrybùrger isch chuum z überschätze.

Werch

Dr Peter Boschung het literarische Werch uf Seislertütsch ù Schrifttütsch in Lyrik ù in Prosa gschrybe. Ùù historischi Abhandlige giits ou va ihm.

• Vam Chnächtetoed, Freiburg i. Ü. 1979
• Spätlese, Freiburg i. Ü. 1986
• Sprachglossen, 1987
• Die freiburgische Sprachenfrage, Freiburg i. Ü. 1989
• Freiburger Lesebuch, Freiburg i. Ü. 1991
• Bosson - Boschung : unsere Vorfahren, Flamatt 1993
• Schlossersch Ana: as Seisler Frouwelääbe, Freiburg i. Ü. 1998

Weblink

• Artikel Peter Boschung im Historische Lexikon vo dr Schwiiz
• Literatur vu un iber Peter Boschung im Katalog vu dr Dytsche Nationalbibliothek