Partenit

Partenit
Партенит Партеніт Partenit
Region uf dr Krim:	Aluschta
geographischi Koordinate:	44° 34′ 35" N, 34° 20' 23" O
Höchi:	30 m
Iwohner:	6'391 Iiwohner (2001)
Postleitzahl:	98542 — 98544
Vorwahl:	+7-6560
Zittzone:	MSK: UTC +3
Partenit

Partenit (ukr. Партеніт, Partenit; russ. Партенит, Partenit; krimtat. Partenit) isch e Ferieort a de Südchüste vo de Krim. Hüt het de Ort öppe 6400 Iiwooner.

Laag

Partenit litt zwöschet Aluschta und Jalta a de Chüste vom Schwarze Meer, nördlich am Fuess vom Berg Aju-Dag, e vulkanische Chegel, wo as e Kap is Meer useluegt. Im Weste erhebt sich öberem Ort de Roman-Kosch, de grööscht Berg vom Krimgebirge.

Gschicht

Partenit am Fuess vom Aju-Dag

De Ort isch spötistens im 7.Jh. bifestigt wore und werd im 8. Jh. z erstmool Parthenitai (Παρθενῖται) gnennt, e Name, wo vermuetli vo altgr. parthenos (παρθένος) »Jungfrau« abglaitet werde cha. Dozmol isch de krimgotischi Bischof Ioannes († 26. Juni 792) z Partenit uf d Welt cho, wo e chliine Handelshafe gsii isch. De Ioannes het d Basilika vo de Apostel Petrus und Paul baue loo. Im 10. Joorhundert isch die aber zerstört wore. 1427 isch d Apostelchile vom gotische Bischof Damian wider uufbaut wore. De Hafe het dozmol zum krimgotische Förstetum vo Theodoro ghört, zittewiis au zu de Genuese.

1474 isch de Ort zum Osmanische Riich choo und 1774 zum Krimchanat. Ane 1778 het d Zarin Katherina di christlichi Bivölkerig, wo Grieche gsii sind, deportiere loo und 1783 isch der Ort zu Russland choo. Er isch vo Krimtatare biwont gsii, wo ane 1944 deportiert wore sind. 1945 hend d Russe de Ort Frunzenskoje (Фрунзенское) gnennt. 1991 isch de Ort zu de Ukraine cho und het wider sin alt Name Partenit öbercho.

Woppe

S Woppe vo Partenit zaigt de Bischof Ioannes vo Gotthia und drunder e Chopf vonere Jungfrau und e Bäär, wa uf de Berg Aju-Dag (»Bäreberg«) hiiwiist.