Parelli Natural Horsemanship

Us der alemannische Wikipedia, der freie Dialäkt-Enzyklopedy

Parelli Natural Horse-Man-Ship, au bekannt als Parelli oder PNH, isch es Programm, wo de natürlich Umgang mit de Ross unterrichte sött, S' Programm, wo wüsseschaftlich nöd evaluiert isch, gaht uf de Rosstrainer Pat Parelli zrugg[1]

I de USA isch s' Parelli Natural Horsemanship eis vu de Programm, wo en Asatz vomene "behuetsame" und "iifühlsame" Rosstraining etabliered.[2] Pat Parelli gild als eine vu de sogenannte Rossflüsterer[1], wobi de Parelli und sini Frau als "Meister vu de Vermarktig und Kommerzialisierig" vum Trainingsasatz gelted.[3] Im Parelli sini Arbete gönd massgeblich uf d Grundlagwerch vum Ray Hunt zrugg.[4]

S Programm[ändere | Quälltäxt bearbeite]

Parelli Natural Horse-Man-Ship isch es Programm, wo e natürlichi Heragahwiis ad Kommunikation mit em Ross lehre sött. Es basiert uf em natürliche Rossverhalte, ums Vertraue und de Respekt vu de Ross i de Ross-Mensch-Beziehig z günne. PNH Methodene gliched mental, emotional und physisch de Art und Wiis, wie Ross underenand i de Herde kommuniziered. S' Ziil isch es, dass Mensche sich nöd wie Mensche oder Raubtier, sondern wie Ross verhalted.[5]

Um das Ziil z erreiche, brucht de Parelli i erster Linie positivi Verstärkig (Komfort) dur Pause nach de richtige Reaktion vum ross, inere kontrollierte Umgebig. Bezeichnend dadefür isch d' Erhöchig vum Druck (Diskomfort) i Abstufige, gnennt "Phase". Trainer und Ross üebed i dere Umgebig Verhaltensmuster (Pattern) ii, wo denn später generalisiert werde sölled.[6] Grundlegen sind debi sipi Spiili, wo ufem Verhalte vonere Sutete mit ihrem neugeborene Fohle basiered[7] und wo es Ross 'de ganz Tag und sis Lebe lang spillt' (Zitat vom Pat Parelli i verschidene Videos).

Als Basis, wie weli Spili gspillt werde sölled und weli Pattern mer bruucht, muess mer am Ross "lese", dur sini Persönlichkeit usefinde. De Parelli het dadefür de Begriff "Horsenality" prägt.

S' Programm selber gliederet sich i 10 Stufe (Levels), vo dene si zur Ziit aber nur di erste vier zuegänglich, und di vier Lernbereich (Savvys):

  • Level 1 (Partnerschaft): Uufbou vunere Kommunikation und Sicherheit im Umgang mit em Ross; Savvy On Line (Bodearbet am Seil)
  • Level 2 (Harmonie): Vertrauensufbou zwüsched Mensch und Ross; Savvy Freestyle (Riite ohni ständige Zügelkontakt)
  • Level 3 (Verfinerig): Verfinerig vu de erste beide Levels; Savvy Liberty (Bodearbet ohne Seil)
  • Level 4 (Vielsitigkeit): Erlernen vu witere Fähigkeite, dass mer schlussendlich s' Ross uf natürlich Wiis zu allem dezue bringe chan, was mer wett; Savvy Finesse (Riite mit finem Zügelkontakt)

Geschicht[ändere | Quälltäxt bearbeite]

Der ehemalig Rodeoriiter Parelli het sis Trainingsprogramm vor allem a Mulis entwickled. Er isch eine vu de erste gsii, wo sich mit sim Programm und Name ane breiti Öffentlichkeit gwendet het und Trainingsprogramm für Ross als Margge etabliert het. Em Parelli isches glunge mit dem Programm weltwiit bekannt z werde und Rosstraining zumene Industriezwiig uszboue. S' «Natural Horsemanship» vum Parelli agiert mittlerwile weltwiit, bildet Trainer us, veröffentlicht Büecher, Videos und grossi Mengene vu Merchandise.[4] Zeme mit sinere Frau tourt er mit emene Konvoi us Trucks, Ross, Hünd und Agstellte dur d USA, um det Rossvorfüehrige z mache und neui Chunde z günne.[3]

Hüt zieht de Amerikaner tuusigi i England a, wie er au als Hauptattraktion vu de grösste Rossustellig z'Australie gilt.[8] D' Humane Society of the United States het em Parelli für si Programm d' Uuszeichnig als menschliche Rossmensch vum Joohr 2009 verleiht.[9]

De Nate Bowers het i Zemearbet mit em Parelli sis Programm um vorbereitendi Üebige für Fuhrross im Natural Horsemanship ergänzt. Mittlerwile wird s Programm au vereinzelt uf anderi Tierarte agwendet, wie zum Biispiil uf Elefanten.[10]

Weblink[ändere | Quälltäxt bearbeite]

Fuessnote[ändere | Quälltäxt bearbeite]

  1. 1,0 1,1 University of Sydney: Science in the Saddle, 12. Juli 2005
  2. Temple Grandin: Livestock Handling and Transport S. 254 CABI, 2007 ISBN 1845932196
  3. 3,0 3,1 Jane Porter Fogleman: The Horse Whisperers in: Virginia Sportsman als pdf Archivlink (Memento vom 7. Jänner 2009 im Internet Archive)
  4. 4,0 4,1 Robert M. Miller: Pat Parelli, Horseman in: American Cowboy Mai-Juni 2000 S. 69
  5. Anna Lisa Peterson: Everyday Ethics and Social Change: The Education of Desire Columbia University Press, 2009 ISBN 0231148739 S. 98-99
  6. D. S. Mills, Sue M. McDonnell: The domestic horse: the origins, development, and management of its behaviour Cambridge University Press, 2005 ISBN 0521891132
  7. Lesley Bayley: Groundwork Training for Your Horse David & Charles, 2006 ISBN 0715324411 S. 67-77
  8. Pip Courtney: [Archivierte Kopie (Memento vom 30. Juni 2013 im Internet Archive) Brisbane Equitana the largest horse expo ever, ABC Landline, 12. Januar 2002
  9. Humane Society: The HSUS Names Pat Parelli as Humane Horseman of the Year, 2. Oktober 2009
  10. Kate Santichen: Horse Trainer Teaches Zoo Keepers Elephant Training Techniques, Good Morning America, ABCNews , 5. September 2009