S Pantheon Baasel

Us der alemannische Wikipedia, der freie Dialäkt-Enzyklopedy
S Museum Pantheon z Muttez

S Pantheon Baasel isch e Forum für Lüt, wo Bsitzer vo Oldtimer si oder en Inträssi an ene häi, mit eme Museum z Muttez mit em Thema Auti und Mobilidäät uf dr Strooss. Dr Inhaaber vom Pantheon isch d Pantheon Basel AG, e 100%igi Dochdergsellschaft vo dr Musfeld AG.

D Idee[ändere | Quälltäxt bearbeite]

D Idee hinder em Pantheon Baasel isch d Kombinazioon von ere Garaasch und Autiwärkstatt mit eme Museum. Uf dr äinte Site isch s en Abstellblatz für Oldtimer, wo mee oder weniger regelmäässig no gfaare wärde, und uf dr andere Site isch s Däil vom Usstelligsruum vom Museum. Eso chönne brivati Sammligsobjekt, wo sust wurde versteckt bliibe, eme öffentlige Publikum zäigt wärde.

Gschicht[ändere | Quälltäxt bearbeite]

Dr Baasler Undernäämer Stephan Musfeld het s Brojekt aagstoosse. Er het per Zuefall die ehemooligi Repratur- und Maschinehalle Züblin z Muttez gfunde. D Halle isch 1965 baut worde und het e Durchmässer ooni Stütze vo 50 Meter und vorgspannti Dachhut, wo nume fümf Santimeter dick isch. Es het denn no zwäi e halb Joor brucht, bis s Forums uf de Bäi gstande isch. Toffol-Architekten Basel häi s Bauwärk entworfe und baut. In die kräisrundi Halle isch e Rampe iibaut worde, wo spiraleförmig ufwärts goot. Liecht schiint dur s Dach und au dur d Wänd duure.

S Pantheon het e Boodeflechi vo 7'500 m², 3'000 m² drvo ghööre zum Museum.

Am 16. August 2008 isch s Pantheon Baasel eröffnet worde.

S Forum[ändere | Quälltäxt bearbeite]

S Pantheon söll e Begegnigsort für Lüt si, wo Oldtimer bsitze oder anene intressiert si. Dorum het s im Forum näben em Museum no s Restaurant Pantheon, und im undere Däil vo dr Halle chönne Konzärt ufgfüert oder nöiji Auti vorgstellt wärde.

Zum Forum ghört die Classic Garage, wo de Chunde brofessionelli Dienstläistige rund um Oldtimer abote wärde. Es het dört e Sattlerei, e Laggiererei und e mechanischi Wärkstatt.

Museum[ändere | Quälltäxt bearbeite]

S Museum isch jeede Daag offe und d Bsuecher chönne die usgstellte Oldtimer bschaue und de Mechaniker und em Sattler bi dr Arbet zueluege. Usser Auti het s au Welo, Döff und Kutsche, under iine s Rennwelo, wo dr «Ferdi National» Kübler mit em 1950 as erste Schwizer d Tour de France gwunne het; oder dr Ordinary Racer, s Hoochraad vom Albert Aichele, wo nume 10 Kilo schweer isch und wo dr Baasler mit em 1887 z Münche e nöije Stundewältrekord (37.08 km/h) ufgstellt het.

Es git Füerige dur d Usstellig, und im Museum-Schop cha mä Modäll vo Auti und Litratuur chaufe.

Weblingg[ändere | Quälltäxt bearbeite]

 Commons: Pantheon Basel – Sammlig vo Multimediadateie
Dä Artikel basiert uff ere fräie Übersetzig vum Artikel „Pantheon_Basel“ vu de dütsche Wikipedia. E Liste vu de Autore un Versione isch do z finde.

Koordinate: 47° 32′ 17″ N, 7° 38′ 2″ O; CH1903: 614711 / 265271