Odin von Lejre

Us der alemannische Wikipedia, der freie Dialäkt-Enzyklopedy
Hops zue: Navigation, Suech
de Odin vo Lejre (öppe 900 n.Chr.); gfunde z Lejre im September 2009

De Odin vo Lejre isch e chliini ggossni Siberstautette, wo de Odin uf sim Thron Hlidskjalf zaigt, der Hoptgott vo de Nordische Mythologii. S Figürli isch i de Wikingerzitt öppe um 900 n.Chr. gmacht wore.

Fundumständ[ändere | Quälltäxt bearbeite]

S Figürli isch vom lokaale Amatöörarchäolog Tommy Olesen am 2. September 2009 grfunde wore, wääred de Uusgrabige vom Roskilde Museum im chliine Dörfli Gammel Lejre (Alt-Lejre), i de Nöchi vo de Stadt Lejre. Sit em 13. November 2009 isch s Figürli im Roskilde Museum uusgstellt und isch e Tail vo de permanente Uusstellig.

s Figürli[ändere | Quälltäxt bearbeite]

S Figürli isch us ggossnigem Silber mit schwarze Niello-Iilage. D Hööchi isch nume 18 Milimeter und s Gwicht bitrait 9 Gramm.

De Odin het e wiite Mantel aa und sitzt uf sim Thron Hlidskjalf, vo wo er öber di ganz Welt luege cha und so mitöberchunnt, wa so abgoot. Di beede Vögel nebet em stelet di beede Rappe Huginn und Muninn dar, wo jede Morge uusflüüget und em Oobe zruggchömed und em Odin verzellet, wa si vernoo und gsie hend. D Rücksitte vom Thron zaigt zwee Tierchöpf, vermuetli die beede Wölf Geri und Freki, wo em Odin sini Huustierli sind. Um de Hals und uf de Brust trait de Odin e Dekoration, wa vellicht de Ring Draupnir darstele cha. Vo dem Ring tropfet all nüü Nächt nüü noiji Ring ab.

S Figüürli vo Lejre zaigt de Odin inere From, wien er vill spööter i de Edda bischriben isch. Zudem understützt de Fund d Theorii, as Lejre i de Wikingerzitt e Königssitz gsii isch, wies jo au i de Sage verzellt werd.

Externe Link[ändere | Quälltäxt bearbeite]