Oberkiefer

Dr Oberchiifer bi de Wirbeldier

Schädel in Seitenansicht:
1. Stirnbei (Os frontale)
2. Scheitelbei (Os parietale)
3. Nasebei (Os nasale)
4. Dränebei (Os lacrimale)
5. Siibbei (Os ethmoidale)
6. Keilbei (Os sphenoidale)
7. Hinderchopfbei (Os occipitale)
8. Schlööfebei (Os temporale)
9. Jochbei (Os zygomaticum)
10. Oberchiifer (Maxilla)
11. Underchiifer (Mandibula)

Dr Oberchiifer (lat. Maxilla) isch e Chnoche vom Gsichtsschädel, wo us eme Chnochebäärli bestoht. Er bildet dr Bode vo dr Augehöhli (Orbita), dr Bode und d Siitewand vo dr Nasehöhli (Cavum nasi) und e Deil vom Gaume und eso s Dach vo dr Muulhöhli (Cavum oris proprium). Im Oberchiifer isch au d Chiiferhöhli (Sinus maxillaris).

Flechene

Am Oberchiiferkörper löön sich vier Flechene lo underscheide: D Gsichtsflechi (Facies anterior) befindet sich vorne am Oberchiiferkörper. D Underschlööfeflechi (Facies inftratemporalis) schliesst noch hinde an d Gsichtsflechi aa und wird vo dr Underjochbeileiste gege d Gesichtsflechi drennt. D Augehöhleflechi (Facies orbitalis) bildet dr grössti Deil vom Augehöhlibode. D Naseflechi (Facies nasalis) bildet die siitligi Wand vo de Nasehöhlene.

Fortsetz und Öffnige

Dr Stirnfortsatz (Processus frontalis) isch d Verbindig zwüschen em Nasebei, em Dränebei und Stirnbei. Dr Jochfortsatz (Processus zygomaticus) het e dreieggigi Form und befindet sich under dr Augehöhliflechi. Dr Alveolarfortsatz (Processus alveolaris) dräit d Zehn und isch entsprächend bogeförmig. Dr Gaumefortsatz (Processus palatinus) isch e woogrächti Blatte und befindet sich zwüsche dr Naseflechi und em Alveolarfortsatz.

Bi Dier het dr Oberchiiferkörper e mehr oder weniger usprägti Chnocheleiste, d Crista facialis. Si isch bi Ross bsunders markant und mä cha se dur d Huut gspüüre. D Crista facialis isch dr oberi Rand wo dr Musculus masseter aasetzt.

Dur en Oberchiifer zieht dr Nervus infraorbitalis (en Ast vom Nervus maxillaris vom Nervus trigeminus) und innerviert dä Chnoche zsämme mit alle Oberchiiferzehn. Er chunnt am Foramen infraorbitale underhalb vo dr Augehöhli us em Oberchiifer an d Oberflächi. Drüber use mache no meh Est vom Nervus maxillaris an dr Innervation vom Gaume mit.

Bluetversorgig

D Bluetversorgig erfolgt dur d Arteria maxillaris.

Dr chnochigi Gaume

Dr chnochigi Gaume (Palatum osseum) bestoht us em Alveolarfortsatz vom Oberchiifer und em Gaumebei. Drei Chnochenöht bilde d Begränzig vo de einzelne Deil: Die mittleri Gaumenoht (Sutura palatina mediana) verlauft vom Schniidzahnloch bis zum hindere Nasedorne. Die queri Gaumenoht (Sutura palatina transversa) chrüzt die mittleri Gaumenoht hinden zwüschen em erste und zweite Stockzahn. D Zwüschechiifernoht (Sutura incisiva) verbindet s Zwüschechiiferbei (Os incisivum) mit em Oberchiiferbei. D Löcher im chnochoge Gaume si für d Närve und d Bluetgfäss wo d Gaumeschliimhuut versorge.

Dä Artikel basiert uff ere fräie Übbersetzig vu dere Version vum Artikel „Oberkiefer“ vu de dütsche Wikipedia. E Liste vu de Autore un Versione isch do z finde.