Nobling

Us der alemannische Wikipedia, der freie Dialäkt-Enzyklopedy

Dr Nobling isch e Wysswy-Truube, wo us ere Chrüzig zwüsche Silvaner un Guetedel (Chasselas) anno 1940 am Wiibauinstitut z'Friburg züchtet worre isch. Z'erscht het er d'Zuchtnummere Fr.128-40 trage, bevor er 1971 als abaufähigi Sorte erlaubt worre isch.

Dr Wy[ändere | Quälltäxt bearbeite]

D'Farb vum Wi isch hällgääl und dr Gschmack isch usszeichnet dur e fiini, fruchtigi Süüri und e liichte bis middlere Körper, wo an Mirabelle und Pfirsich söll erinnere.

In sehr guet Lage erreicht dr Nobling in normale Johre liicht Öchslegrade vu 90 bis 110 un demit Spot- un Usläsiqualitäte. In mindere Lage oder bi ere z'grosse Mengi chummt er degege grad in d'Kabinettqualität.

Er wird vor allem noch m Markgräflerland abaut. Au Sekt isch ab dr 1990er us dere Truube hergstellt worre. Säll isch aber mit dem Wegfall vu dr meischte Rebflächi middlerwil beditigslos worre.

Nobling bruucht fer e guete Wy gueti Lage. Leider isch er au in schlechtere Lage abaut worre un het dorum e schlechte Ruef kriegt. Er isch dorum schwer verkäuflich worre. Ufgrund vu dr guete Qualität vu dr Truube isch dr Nobling dorum verstärcht versektet worre.

D'Räbe[ändere | Quälltäxt bearbeite]

E Noochdeil vu dr Noblingräbe sin ihri Ranke. Nobling het e starchi Rankebildig un mer bruucht ebba dreimol so lang zum Schniide wie fer Burgunder, ebba doppelt so lang wie bim Guetedel un eineihalbmol so lang wie bim Müller-Thurgau.

Nobling isch im Winter eweng froschtempfindlicher wie anderi Rebsorte. So hän in dr Middi vu dr 1980er Johre d'Starchfröst dr Nobling-Räbe stärcher zuegsetzt wie andere Sorte.

E bsunderi Charakteristik vu dr Noblingräbe isch e starch uregelmässige Ustriib. Während anderi Sorte d'Schoss gliichmässig ustriibe düen, isch dr Nobling später un menki Auge sin scho witt ustriibe, anderi degege grad in dr Wulle. Des gliicht sich aber bis zue dr Blüeti us.

D'Noblingtruube isch eweng grösser wie sälli vum Müller-Thurgau.

In dr ledschte Johre isch d'Abauflächi vum Nobling starch zruckgange zue Gunschte vu besser verkäufliche Sorte wie Burgunder un Guetedel (Chasselas). 2001 het d'Abauflächi noch ca. 95 ha betrage un isch sither witter gschrumpft, so dass D'Sorte middlerwil fascht beditigslos worre isch. 2015 sin noch 54 ha in Bade erhobe worre, un chleini Stickli in dr Schwiz.

Weblink[ändere | Quälltäxt bearbeite]

  • Nobling in dr Datebank Vitis International Variety Catalogue vum I Institut für Rebenzüchtung Geilweilerhof (änglisch)