Nationale Front (Schweiz)

Us der alemannische Wikipedia, der freie Dialäkt-Enzyklopedy
Hops zue: Navigation, Suech

Die Nationali Front (NF) isch e schwiizerischi faschistischi Partei währed de 1930er und 1940er Johr gsi.

Entwicklig[ändere | Quälltäxt bearbeite]

Die Nationali Front isch die iiflussriichsti Partei vo der sogenannte Frontebewegig gsi, wo am Afang vo de 1930er Johr s politische System vo der Schwiiz mit ere neue nationalistische Ideologii usegforderet het. Zwei Hochschuelgruppe an der Uni Züri si vo faschistische Ideä, wo zu sällere Ziit sich in ganz Europa breit gmacht hai, und vo dr politische Bewegig, wo im Nochberland Italie scho 1923 an d Macht cho isch, beiiflusst worde und hai sich vo 1930 aa afo organisiere. Die Neui Front, wo ehnder akademisch-elitär prägt gsi isch, und die proletarisch-völkischi Nationali Front hai sich im April 1933 zum Kampfbund Neui und Nationali Front zsämmegschlosse, und us däm isch denn im Mai d Partei Nationali Front entstande.

Die het in de Mönet druf, ere Ziit, wo men ere in dr Schwiizer Gschicht Frontefrüehlig sait, e dütlige Zuelauf vo Wehler und es Awachse an Iifluss erläbt. Dä Ufschwung isch äng mit der Machtergrifig vom Adolf Hitler im Dütschen Riich e baar Wuche vorhär verbunde gsi.

Ihre grösst Erfolg het die Nationali Front im Herbst 1933 gha, wo si bi kantonale Wahle im Kanton Züri und z Schaffhuse dr Sprung in dr Schwiizer Nationalrot gschafft het. Die Gebiet, wo nooch an dr dütsche Gränze si, si d Hochburge vo der Partei gsi. In andere Regione, vor allem in der wälsche Schwiiz und imTessin, het die Nationali Front nie richdig chönne Fuess fassen.

Ideologisch het sich die Nationali Front immer dütliger an s nationalsozialistische Vorbild vo der NSDAP aglehnt und het zum Bischbil d Rächtsgliichheit vo de Jude welle ufhebe.[1] Am Afang het d Partei mindestens nach Usse non e Sonderwäg vo der Schwiiz bedont, vo 1936 aa het si sich aber offe zur dütsche nationalsozialistische Weltaschauig bekennt. Das het bi de meiste Schwiizer Widerstand erregt und dr schliichend Niidergang vo der Partei iigleitet. Wi die gmässigte Chreft d Partei verlo hai, het sich die Nationali Front meh und meh zun ere radikale Splittergruppe vo nationalsozialistische Schwiizer entwigglet.

Spötistens sit dr Mitti vo de 1930er Johr het d Partei geheimi paramilitärischi Eiheite afo bilde und isch zum offene Kampf gege s System übergange. Si het verschiideni chliineri Aschleg z Züri und z Bärn usgfüehrt und het im Summer vo 1937 e Marsch uf Bärn verastaltet, wo nit agmäldet gsi isch und bi welem Parteimitgliider für e baar Stunde dr Bundesblatz bsetzt und sich gwaltdätigi Usenandersetzige mit der Polizei gliiferet hai.

Sit 1938 isch die Nationali Front immer sterker vo dr Polizei überwacht worde. Das het im Früehlig vo 1940 zur Verhaftig vom Parteifüehrer Robert Tobler gfüehrt und drzue, ass sich d Partei sälber ufglöst het, was aber nit s Ändi vo der Bewegig bedütet het, sondern nume e Namensänderig: Fast alli alte Mitgliider hai mit ihre Aktivitäte under em neue Name Eidgenössischi Sammlig wiiter gmacht.

Üsseri Erschiinig[ändere | Quälltäxt bearbeite]

Üsserlig het sich die Nationali Front an Elemänt vo der mittelalterlige Alte Eidgenosseschaft orientiert, aber au an faschistische und nationalsozialistische Vorbilder wie der NSDAP.

S Emblem vo der Nationale Front isch die alti Schwiizerfahne gsi, wos Chrüz druf bis zum Fahnerand cho isch (e Symbol, wo underdesse au in ere liicht gänderete Form vo der PNOS brucht wird). Dr offiziell Gruess vo de Frontiste isch s altschwiizerische Harus, wo me dr rächt Arm drbi ufglüpft het. Bis zum gsetzlige Verbot vo Parteiuniforme het d „Schutzstaffle“ vo der Partei, wo in so genannte Harst organisiert gsi isch, graui Uniforme agha.

Mitgliidszahle[ändere | Quälltäxt bearbeite]

Die Nationali Front het keini offeni Mitgliidsbüecher gha, dorum isch s schwiirig d Mitgliidszahle z schätze. Noch Abschetzige het d Front 1933 4.000, 1934 5.000, 1935 9.000 und 1939 2.300 Mitgliider gha.

Parteifüehrer[ändere | Quälltäxt bearbeite]

Prominenti Mitgliider[ändere | Quälltäxt bearbeite]

Lueg au[ändere | Quälltäxt bearbeite]

Literatur[ändere | Quälltäxt bearbeite]

  • Glaus, Beat: Die nationale Front. Eine Schweizer faschistische Bewegung 1930–1940. Zürich, Einsiedeln, Köln 1969.
  • Wolf, Walter: Faschismus in der Schweiz. Die Geschichte der Frontenbewegungen in der deutschen Schweiz. 1930–1945. Zürich 1969.

Fuessnote[ändere | Quälltäxt bearbeite]

  1. Thomas Metzger, Antisemitismus in der Stadt St. Gallen 1918-1939, Saint-Paul, 2006, S.335
  2. David Lee Preston: “Hitler's Swiss Connection”, in: The Philadelphia Inquirer, 5. Januar, 1997.

Weblingg[ändere | Quälltäxt bearbeite]

Dä Artikel basiert uff ere fräie Übersetzig vum Artikel „Nationale_Front_(Schweiz)“ vu de dütsche Wikipedia.

E Liste vu de Autore un Versione isch do z finde.